«Referendým–2026» respýblıkalyq onlaın marafony ótip jatyr
ASTANA. KAZINFORM — Onlaın-marafon Jibek joly jáne ózge de respýblıkalyq telearnalar men ınternet-portaldardyń YouTube jáne Facebook jelisindegi platformalary arqyly translıatsııalanady.
Saǵat 09:00-de bastalǵan onlaın marafon 01:00-ge deıin jalǵasady. On alty saǵatqa sozylatyn efır barysynda qoǵamdaǵy ózekti máseleler talqylanyp, el damýyna qatysty bastamalar men ınnovatsııalyq jobalar tanystyrylady.Aýqymdy sharany «Qazaqstan» teleradıokorporatsııasy uıymdastyryp otyr.
Uıymdastyrýshylardyń málimetinshe, is-shara barysynda alǵash ret otandyq ónertapqyshtar jasaǵan robottar marafon júrgizýshilerine kómektesedi. Sonymen qatar gologramma tehnologııasy arqyly Qazaqstannyń jetistikteri tanystyrylady.
Marafon aıasynda bes negizgi alań jumys isteıdi. Atap aıtqanda, basty sahnada qoǵam qaıratkerleri, sarapshylar men tanymal tulǵalardyń qatysýymen pikirtalastar ótedi. Tok-shoý alańynda bilim berý, kreatıv ındýstrııa, tsıfrlandyrý, jasandy ıntellekt jáne jastar mádenıeti taqyryptary talqylanady.
Sondaı-aq ortalyq kommýnıkatsııalar alańynda referendýmnyń ótý barysyna qatysty resmı organdardyń ókilderi men sarapshylar ár eki saǵat saıyn tikeleı efırde pikir bildiredi. Ekspress-kamera formatynda jýrnalıster qatysýshylar men kórermenderden blıts-suhbat alyp, olardyń pikirin jetkizedi.
Marafon barysynda «Kıbersport», «Inklıýzıvti qoǵam», «Áıelderdiń quqyqtary men balalardyń qaýipsizdigi», «Bala tárbıesi: dástúr men zamanaýı ádisterdiń sabaqtastyǵy», «Patrıotızm», «Jasandy ıntellektiniń damýy», «Kreatıvti ındýstrııa», «Volonterlik – jańa azamattyq mádenıet», «Bilim berý», «Ulttyq mýzyka – jańa formatta» sekildi ózekti taqyryptar qozǵalady.
Onlaın marafonǵa AQSh, Reseı, Túrkııa, Qytaı jáne Belgııa elderinen, sondaı-aq Qazaqstan óńirlerinen menshikti tilshiler tikeleı qosylady.
Medıasharada alǵash ret uıymdastyrylǵan ınnovatsııa alańynda otandyq ónertapqyshtardyń birqatar jobasy tanystyrylady. Atap aıtqanda, aǵylshyn tilin úıretýge arnalǵan Aleem qosymshasy, bolashaqta adam aǵzasyna salynýy múmkin mehanıkalyq júrek jobasy, sal aýrýyna shaldyqqan adamdarǵa arnalǵan jańa arba jáne maıtabandy anyqtaıtyn «aqyldy» ultaraq kópshilik nazaryna usynylady.
Budan bólek, Tótenshe jaǵdaılar departamentiniń mamandary órt sóndirýge arnalǵan robottyń múmkindikterin tanystyrady.
Sondaı-aq jasandy ıntellektpen jumys isteıtin robot ıtter belgilengen aýmaqty avtonomdy túrde baqylap, beıneaqparatty basqarý ortalyǵyna jiberedi. Sonymen qatar shahterlerdiń qaýipsizdigin arttyrýǵa arnalǵan Mainsafe smart-qolǵaby men lastanǵan aýadan prınterge arnalǵan qara boıaý óndirýge múmkindik beretin ınnovatsııalyq joba da tanystyrylady.
Sonymen qatar «Referendým–2026» arnaıy Telegram arnasy jumys isteıdi.
Aıta keteıik, 12 aqpanda Qazaqstan Respýblıkasynyń jańa Ata Zańynyń qorytyndy jobasy jarııalanǵan bolatyn.
Búgin elimizdiń barlyq aımaqtarynda saılaý ýchaskeleri jumys istep tur.
Eger azamat eshqaıda tirkelmegen bolsa, munyń da sheshimi qarastyrylǵan. El boıynsha 220 ýchaskege 1 táýlikke tirkelýge bolady. Mundaı jaǵdaıda azamat tizimge engizilip, daýys berý úshin oǵan bıýlleten usynylady.