Referendým-2024: Ózbekstandaǵy Qazaqstan azamattarynyń 14% tańdaý jasap úlgerdi

TAShKENT. KAZINFORM – Ózbekstandaǵy Qazaqstan azamattary AES salý máselesi boıynsha referendýmda belsendi daýys berip jatyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Saǵat 11:00-degi aqparatqa saı, Tashkenttegi №399 referendým ýchaskesinde saılaýshylar tizimine engen 600 qazaqstandyqtyń 14% daýys berdi.

Atalǵan ýchaskege Tashkenttegi joǵary oqý oryndarynda oqıtyn stýdentter, Ózbekstanda ýaqytsha jumys isteıtin jáne turatyn otandastarymyz, qazaqstandyq týrıster men issaparda júrgen azamattar kelip jatyr.

Aıta ketsek, buǵan deıin atalǵan ýchaskede alǵash bolyp daýys bergen qazaqstandyq Zámzá Haırýllına «eldik máselelerde tańdaý jasaýdan qalys qalmaı, azamattyq ustanymyn bildirý mańyzdy», dep pikir bildirip edi.

Buǵan qosa, Ózbekstanǵa jarysqa kelgen qazaqstandyq sportshylar da óz tańdaýyn №399 referendým ýchaskesinde jasady.

Eske salaıyq, Tashkent qalasyndaǵy №399 referendým ýchaskesi Qazaqstan Respýblıkasynyń elshilgi ǵımaratynda (Abaı kóshesi, 1) ornalasqan. Onda daýys berý jergilikti ýaqyt boıynsha 20:00-ge deıin jalǵasady.