Referendým: 10 elde daýys berý ýchaskeleri ashylmaıdy

ASTANA. KAZINFORM — QR Syrtqy ister mınıstrliginiń resmı ókili Erlan Jetibaev shetelde referendým ótkizý daıyndyǵyna baılanysty túsinik berdi. 

— Qazaqstan Syrtqy ister mınıstrliginde referendým ótkizý máseleleri boıynsha arnaıy shtab quryldy. Taıaý Shyǵystaǵy áskerı-saıası jaǵdaıdyń ýshyǵýyna, Ýkraına men Efıopııadaǵy qaýipsizdik deńgeıiniń tómendigine baılanysty 10 eldegi 11 ýchaskeniń jumysyn ýaqytsha toqtatý týraly sheshim qabyldandy. Olardyń arasynda Qazaqstan Respýblıkasynyń Iran, Izraıl, Iordanııa, Qatar, Birikken Arab Ámirlikteri, Oman, Lıvan, Kýveıt, Ýkraına jáne Efıopııadaǵy elshilikter janyndaǵy, sondaı-aq Dýbaı qalasyndaǵy Qazaqstan Konsýldyǵy janyndaǵy ýchaskeler jatady, — dedi Erlan Jetibaev mınıstrliktegi baspasóz máslıhatynda.

Onyń aıtýynsha, referendým kezinde 54 elde 71 ýchaske jumys isteıdi. Referendým kezinde 31 eldegi 68 buqaralyq aqparat quralynan 185 ókil habar taratpaq.

Buǵan deıin habarlanǵandaı, referendýmge halyqaralyq baıqaýshylardy tirkeý aıaqtaldy.