Redjep Taııp Erdoǵanǵa Prezıdent saılaýynda sáttilik tileımin - Qasym-Jomart Toqaev

ANKARA. QazAqparat – QR Prezıdenti Qasym-Jomart Toqaev Túrki memleketteri uıymynyń «Apat jáne tótenshe jaǵdaılar menedjmenti, gýmanıtarlyq kómek» atty kezekten tys sammıtinde sóılegen sózinde Redjep Taııp Erdoǵanǵa Prezıdent jáne Parlament saılaýynda sáttilik tiledi, dep habarlaıdy QazAqparat Aqordaǵa silteme jasap.

«Qıyn sátte halyqaralyq qaýymdastyqtyń túrik halqyna qoldaý kórsetýi Redjep beıdiń joǵary bedeli men eline jasap jatqan rııasyz qyzmetiniń nátıjesi dep sanaımyn.

Bıyl Túrkııa Respýblıkasyna 100 jyl tolady. Bul – úlken tarıhı meje. Túrkııa qysqa merzimniń ishinde qýatty, yqpaldy memleketke aınaldy. Onyń halyqaralyq yqpaly jáne bedeli, rasynda óte kúshti. Osy jerde Redjep Taııp Erdoǵannyń eńbegi jáne úlesi aıqyn. Ony búkil álem moıyndap jatyr.

Osy rette, qadirmendi Redjep Taııp Erdoǵan myrzaǵa aldaǵy Prezıdent jáne Parlament saılaýynda sáttilik tileımin. Túrik jurty Sizge barynsha qoldaý kórsetedi dep senemin», - dedi Qasym-Jomart Toqaev.