Redaktsııa alqasy Qazaqstan tarıhynyń ekinshi tomyn basyp shyǵarýǵa ázirleý úshin bekitti

ASTANA. KAZINFORM – Búgin Almatyda Memlekettik keńesshi Erlan Qarınniń tóraǵalyq etýimen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleýge qatysty redaktsııa alqasynyń kezekti otyrysy ótti, dep habarlaıdy Aqordanyń baspasóz qyzmeti.

Redaktsııa alqasy jalpy daýys berý arqyly odan ári baspaǵa daıyndaý úshin basylymnyń ekinshi tomynyń qoljazbasyn bekitý týraly sheshim qabyldady. Sondaı-aq jeti tomdyq eńbektiń úshinshi tomynyń mazmunyn talqylady.

Avtorlar ujymynyń jetekshisi, L.N. Gýmılev atyndaǵy Eýrazııa ulttyq ýnıversıteti Aımaqtaný kafedrasynyń professory, tarıh ǵylymdarynyń doktory Aıbolat Kóshkimbaev basylymnyń tujyrymdamasy, mazmuny jáne qurylymy jóninde baıandama jasap, «Altyn orda» dep atalatyn úshinshi tomnyń erekshelikteri men jańalyǵyn atap ótti. Sh.Sh. Ýálıhanov atyndaǵy Tarıh jáne etnologııa ınstıtýtynyń bas dırektory, Ulttyq ǵylym akademııasynyń akademıgi Zııabek Qabyldınov, Memleket tarıhy ınstıtýty dırektorynyń orynbasary, tarıh ǵylymdarynyń doktory, professor Búrkitbaı Aıaǵan, ál-Farabı atyndaǵy Qazaq ulttyq ýnıversıtetiniń professory, tarıh ǵylymdarynyń doktory Bereket Káribaev pikir bildirdi.

Sondaı-aq redaktsııa alqasynyń Murat Ábdirov, Galına Ksenjık, Radık Temirǵalıev, Kenjehan Matyjanov, Dıhan Qamzabekuly, Aıdos Sarym, Hankeldi Ábjanov, Mámbet Qoıgeldıev, Merýert Ábýseıitova, Aıgúl Sádýaqasova, Bolat Kómekov, Aqan Ońǵar, Jaqsylyq Sábıtov sekildi ózge de músheleri óz oılaryn ortaǵa saldy.

Jıyn sońynda redaktsııa alqasy úshinshi tomdy jetildirý jumystaryn jalǵastyrý jáne kelesi otyrysta «Qazaqstan tarıhy: ejelgi dáýirden búginge deıin» atty akademııalyq basylymnyń tórtinshi tomyn qarastyrý jóninde sheshim qabyldady.

Osyǵan deıin Erlan Qarınniń analıtıkalyq qurylymdardyń qyzmetin úılestirý boıynsha jıyn ótkizgeni týraly jazdyq.