Redaktsııa alqasy Qazaqstan tarıhynyń Altyn Ordaǵa arnalǵan úshinshi tomyn bekitti
ASTANA. KAZINFORM — Almatyda Memlekettik keńesshi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleýge qatysty redaktsııa alqasynyń kezekti otyrysy ótti. Bul týraly Aqordanyń baspasóz qyzmeti habarlady.
Redaktsııa alqasy jalpy daýys berý arqyly baspaǵa daıyndaý úshin basylymnyń úshinshi tomynyń qoljazbasyn bekitý týraly sheshim qabyldady.
Osy jumysty qorytyndylaǵan Memlekettik keńesshi otandyq tarıh ǵylymyndaǵy Altyn Orda taqyrybynyń mańyzyna toqtaldy.
— Memleket basshysynyń bastamasymen 2022 jyly Joshy ulysyn zertteý ǵylymı ınstıtýty quryldy. Keler jyly elimizde Altyn Orda murasyn zerdeleýge arnalǵan halyqaralyq konferentsııa ótkizý josparlanyp otyr. Búgin Qazaqstan tarıhynyń Altyn Orda dáýirine arnalǵan jeke akademııalyq tomyn bekittik. Túptep kelgende, osynyń bári Qazaqstanda Altyn Ordany zerdeleý jóninde arnaıy ǵylymı-tarıhı mektep qalyptasyp jatqanyn aıǵaqtaıdy, — dedi Erlan Qarın.
Sondaı-aq jıynda jeti tomdyq eńbektiń tórtinshi tomynyń mazmuny talqylandy.
Avtorlar ujymynyń jetekshisi, tarıh ǵylymdarynyń doktory, R.B. Súleımenov atyndaǵy Shyǵystaný ınstıtýty janyndaǵy Tarıhı materıaldardy zertteý respýblıkalyq aqparattyq ortalyǵynyń dırektory, Ulttyq ǵylym akademııasynyń akademıgi Merýert Ábýseıitova jáne tomnyń úılestirýshisi, tarıh ǵylymdarynyń doktory, Sh. Sh. Ýálıhanov atyndaǵy Tarıh jáne etnologııa ınstıtýtynyń bas dırektory, Ulttyq ǵylym akademııasynyń akademıgi Zııabek Qabyldınov basylymnyń tujyrymdamasy, mazmuny jáne qurylymy týraly baıandama jasap, «Qazaq handyǵy» dep atalatyn tórtinshi tomnyń erekshelikteri men jańalyǵyn atap ótti.
Sonymen qatar Parlament depýtaty, tarıh ǵylymdarynyń doktory, professor Erkin Ábildiń, tarıh ǵylymdarynyń kandıdaty, ál-Farabı atyndaǵy Qazaq ulttyq ýnıversıteti túlekteri qaýymdastyǵynyń atqarýshy dırektory Kúlgazıra Baltabaevanyń, «Qazaq tarıhı qoǵamynyń» basqarma tóraǵasy Radık Temirǵalıevtiń retsenzııalary tyńdaldy.
Mámbet Qoıgeldıev, Aıdos Sarym, Orazaq Smaǵulov, Hankeldi Ábjanov, Mıhaıl Akýlov, Kenjehan Matyjanov, Búrkitbaı Aıaǵan, Galına Ksenjık, Jaqsylyq Sábıtov, Bereket Káribaev, Dıhan Qamzabekuly, Sábıt Shildebaı, Murat Ábdirov sekildi redaktsııa alqasynyń basqa da músheleri óz oı-pikirlerin ortaǵa saldy.
Jıyn sońynda redaktsııa alqasy tórtinshi tomdy jetildirý jumysyn jalǵastyryp, kelesi otyrysta qarastyrý jóninde sheshim qabyldady.
Aıta ketelik redaktsııa alqasy Qazaqstan tarıhynyń ekinshi tomyn basyp shyǵarýǵa ázirleý úshin bekitken edi.