Redaktsııa alqasy Qazaqstan tarıhy jónindegi akademııalyq basylymnyń birinshi tomyn qarady
ASTANA. KAZINFORM – Búgin Memlekettik keńesshi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty akademııalyq 7 tomdyqty daıyndaý jónindegi redaktsııa alqasynyń alǵashqy otyrysy ótti. Bul týraly Aqordanyń baspasóz qyzmeti habarlady.
Redaktsııa alqasynyń aldynda turǵan basty mindet – kóptomdyqtyń mátin materıaldaryn, kartalary men ıllıýstratsııalaryn túpkilikti saraptaý jáne bekitý, sondaı-aq ony betteýge, baspaǵa daıyndaý.
Basqosýda basylymnyń kóne dáýirge arnalǵan birinshi tomy qarastyryldy.
Alqa músheleri akademııalyq basylymnyń birinshi tomynyń jetekshisi, Á.H. Marǵulan atyndaǵy Arheologııa ınstıtýtynyń bas dırektory Aqan Ońǵarulynyń baıandamasyn tyńdap, usynylǵan materıaldyń tujyrymdamasyn, mazmuny men qurylymyn talqylady. Jıynda retsenzentshiler Ulttyq ǵylym akademııasynyń akademıgi, tarıh ǵylymdarynyń doktory Jáken Taımaǵambetovtyń, tarıh ǵylymdarynyń kandıdaty, Toraıǵyrov ýnıversıtetine qarasty Á.H. Marǵulan atyndaǵy Arheologııalyq ǵylymı-zertteý ortalyǵynyń dırektory Vıktor Mertstiń, Sh.Sh. Ýalıhanov atyndaǵy Tarıh jáne etnologııa ınstıtýtynyń aǵa ǵylymı qyzmetkeri Nursan Álimbaıdyń sarapshylyq pikirleri tyńdaldy. Sondaı-aq redaktsııa alqasynyń basqa da músheleriniń oı-pikirleri ortaǵa salyndy.
Redaktsııa alqasynyń kelesi otyrysy tamyz aıynda ótedi. Onda «Qazaqstan tarıhy: ejelgi dáýirden búginge deıin» atty akademııalyq basylymnyń ekinshi tomy talqylanady.
Aıta ketelik keshe Erlan Qarın etnosaralyq kelisim máselelerine arnalǵan respýblıkalyq jıyn ótkizgen edi.