Reanımatolog naýqas qandaı jaǵdaıda tynys alý apparatyna qosylatynyn aıtty
ALMATY. QazAqparat –Reanımatolog-anestezıolog Tileýberdi Qýandyqov naýqastar jasandy tynys alý apparatyna qaı jaǵdaıda qosylatynyn aıtty, dep habarlaıdy QazAqparat tilshisi.
Onyń aıtýynsha, jansaqtaý bólimine túsken adamdardyń barlyǵy birden ókpeni jasandy jeldetý apparatyna qosylmaıdy.
«Jasandy jeldetý apparatyna qosý májbúrlikten týady. Adam óz betimen dem ala almaǵan kezde. Jalpy jasandy tynys alýmen KVI ınfektsııalyq pnevomnııadan basqa birneshe aýrýlar bar. Ókpe aýrýlary, respıratorlyq dıstress sındrom bolǵan jaǵdaıda 100 paıyz apparatpen demalady. Al esin bilmeıtin naýqastar jáne bar. Botýlızm, polıomelıt degen dıagnozǵa shaldyqqandar uzaq ýaqyt jata berýi múmkin. Ýaqyty da ártúrli bolady. KVI pnevmonııasynyń da óz aýyrlyq satysy bar. Neǵurlym aýyr bolsa soǵurlym uzaǵyraq jatady. Jeńil bolsa, qysqaraq jatady. Naýqas 5 kúnniń ishinde apparattan alynýy múmkin. Keıde 1 aı nemese odan kóp jatatyndar bar», - dedi Tileýberdi Qýandyqov Almatyda ótken onlaın brıfıng barysynda.
Reanımatologtar naýqasty jan-jaqty qoldaý úshin taǵy basqa túrli reanımatsııalyq sharalardy qabyldaıdy.
«ÓJJ apparatynda jatqan adamǵa massaj, gımnastıka jasalady. Ony vertıkaldy qalypta jatqyzǵan nemese etpetinen jatqyzǵan tıimdi. Aýyr naýqastyń barlyǵy apparatta jatpaıdy. Keıde adam ózi demalýy múmkin. Biraq oǵan ottegi jetispeýshiligi báribir bolady. Oǵan ottegin qosamyz. Bul terapııa oksıgenatsııa dep atalady. Odan bólek naýqasqa qajettiligine qaraı vırýsqa qarsy, bakterııaǵa qarsy, gormonaldy, antıkoagýlıantty terapııa jasalýy múmkin», - dedi maman.
