Realıtı shoý: Túrkistandyq jastar alma terip, qoı qyrqyp, kartop qazýdan ózara básekege tústi

TÚRKІSTAN. QazAqparat – Túrkistandyq jastar eki kúnderin aýyldyń tynys-tirshiligimen tanysýǵa arnady. «Aýyldaǵy bir kúnim» televızııalyq realıtı-shoýy aıasynda belsendi de, ónerli volonterler «Mal men egin – kól-kósir ónim» saıysyna qatysty, dep habarlaıdy QazAqparat tilshisi.

Bul jobaǵa 16 aýdan-qaladan eki jastan qatysyp, olar jerebe boıynsha tórt komandaǵa bólindi. Saıystyń alǵashqy kúni Qazyǵurt aýdanyndaǵy baqtan alma terip, jigitter qoı qyryqty. Saýran aýyldyq okrýginde kartop qazyp, ony jınap jarysty. Ári qaraı maqta terip, jalpy salmaǵy nazarǵa alyndy. Eki kún boıy aýyr da ári qyzyqty jumystar boıynsha saıysqa túsken jas volonterler jarys sońynda ıntellektýaldylyq jaǵynan synǵa tústi. Qazaqtyń salt-dástúri men yrym-tyıymdary boıynsha bilimderin baıqatty.

«Bul - jastardy eńbekke baýlýǵa arnalǵan jaqsy joba. Ata kásiptiń jandanýy men aýyl sharýashylyǵyndaǵy ınnovatsııalyq damý, sharýashylyqqa jańa tehnologııalardy endirý - endigi jastardyń enshisinde. Qazaqstan keleshekte álemdik azyq-túlik qaýipsizdigin qamtamasyz etýde óziniń tabıǵı resýrstaryna saı, laıyq oryn alady dep senemiz. Osy maqsatta jastar da óz úlesterin qosady degen úmittemiz» -, dedi oblystyq «Jastar resýrstyq ortalyǵynyń» basshysy Amalbek Ómirtaı.

Jastar eki kún boıy naǵyz aýyl ómirin sezinip, ózderiniń eńbekke qabilettilikterin dáleldedi. Nátıjesinde bas júlde «Turan» tobyna buıyrdy. Jeńimpaz jastarǵa alǵys hat pen baǵaly syılyqtar tabystaldy.