«Realdyń» bas bapkeri Hýlen Lopotegı qyzmetinen bosatyldy
ASTANA. QazAqparat - Ispanııalyq «Real» fýtbol klýbynyń bas jattyqtyrýshysy Hýlen Lopotegı otstavkaǵa ketti, dep habarlaıdy QazAqparat. Bul týraly madrıdtik klýbtyń baspasóz qyzmeti málim etti.
Ázirge komandanyń bas bapkeri qyzmetin Santıago Soları ýaqytsha atqara turady.
Eske sala keteıik, La Lıganyń onynshy týr oıynynda «Barselonamen» kezdesken «Real» 5:1 esebimen oısyraı jeńilgen bolatyn. 10 týrdan keıin madrıdtik klýb 14 upaımen chempıonatta 9-shy orynda tur. Oıynnan keıin Hýlen Lopotegı jumystan ketý jóninde oılanyp júrgenin, biraq ol sheshimdi ózi qabyldamaıtynyn jetkizgen edi.
Al dúısenbi kúni dırektorlar keńesiniń jınalysyn ótkizgen «Real» 52 jastaǵy bapkermen kelisimshartty buzý jóninde sheshim qabyldady. Jalpy, Lopotegıdiń komandaǵa kelgenine 4 aı endi tolǵan. Ispan BAQ-tarynyń málimetinshe, «Realdyń» bas bapkeri qyzmetine ıtalııalyq Antonıo Konte kelýi múmkin.
Foto: ruspekh.ru
