«Real Sosedad» pen «Barselona» teń tústi
ASTANA. QazAqparat - Fýtboldan Ispanııa chempıonatynyń 13-shi týry aıasynda san-sebastıandyq «Real Sosedad» óz alańynda katalonııalyq «Barselonany» qabyldady, dep habarlaıdy «Kazsport» telearnasy.
Oıynnyń alǵashqy mınýttarynan bastap alań ıeleri udaıy shabýyldaýmen boldy. Al, katalonııalyqtar bul matchta favorıt bolǵanymen, birinshi taımda azýly MSN úshtiginiń ókilderi eshqandaı nátıjeli áreketterimen kózge túspedi. Oıyn negizinen alańnyń «Barselona» jaǵynda júrip, qaýipti sátter Mark-Andre ter Shtegen qaqpasy mańaıynda týyndady. Ásirese, bul sátterde «Real Sosedadtyń» meksıkalyq fýtbolshysy Karlos Vela belsendi boldy.
Ekinshi taım tartysty ótti. Kezdesýdiń 53-shi mınýtynda Karlos Vela katalonııalyq komandanyń birneshe qorǵaýshysysh artta qaldyryp, qaqpaǵa onyń baǵyttaǵan soqqysyn Mark-Andre ter Shtegen qaıtarǵanymen, dopqa birinshi bolyp Vıllıan Joze jetip, basymen dopty qaqpaǵa qaraı urady - 1:0.
Birneshe mınýttan soń (59') Neımar sol qanattan shabýyldap, «Barselonanyń» basty juldyzy Lıonel Messıge pas shyǵarady. Al, argentınalyq shabýylshy dopqa eki ret qana aıaq tıgizip, esepti teńestiredi - 1:1.
