«Real» Ronaldýdan qutylýdyń jolyn izdeýde - BAQ
ASTANA. QazAqparat - «Real» prezıdenti Florentıno Peres komandanyń kóshbasshy oıynshysy Krıshtıaný Ronaldýdy satýǵa ruqsatyn berdi. Madrıdtik komanda basshysy Ronaldýdyń agenti Jorje Mendeshpen kezdesip, oıynshyǵa jańa klýb izdestirýdi tapsyrǵan, dep habarlaıdy QazAqparat prosports.kz saıtyna silteme jasap.
32 jastaǵy portýgalııalyq oıynshynyń klýb prezıdentine ókpesi qara qazandaı. Peres Ronaldýǵa jańa kelisim usynyp, aılyǵyn kóterýdi ýáde etkenimen, sózinde tura almaǵan.
Ronaldýdyń «Realmen» qazirgi kelisimi 2021 jyly aıaqtalady.
Krıshtıaný óziniń burynǵy klýby «Manchester ıÝnaıtedke» qaıtyp oralady degen áńgime jıi aıtylýda.
«Keıbir aqparat kózderi «Real» PSJ klýbyna Ronaldýdyń ústine aqsha qosyp berip Neımarǵa aıyrbas jasaýdy kózdeıtindigin habarlaýda. Qalaı degenmen de bir nárse túsinikti sııaqty, madrıdtik komanda shaý tarta bastaǵan Ronaldýdan qutylýdyń jolyn qarastyrýda», - dep jazady saıt.
Bıylǵy maýsymda Ronaldý Ispanııa birinshiliginde «Real» úshin tórt-aq gol soqqan.
