«Real Madrıdtiń» Almaty týraly vıdeosyn mıllıondaǵan paıdalanýshy tamashalady

ASTANA. KAZINFORM — Ispanııanyń áıgili «Real Madrıd» fýtbolshylary Qazaqstanǵa kelgen soń klýbtyń resmı Instagram paraqshasynda Almaty qalasy týraly eki beınerolık jarııalaǵan.

Almaty ákimdiginiń málimetinshe, qalanyń sulýlyǵyn beıneleıtin eki rolık az kúnde 20 mıllıonnan astam qaralym jınap, 100 myńnan asa adam pikir qaldyrǵan.

Vıdeolarda Almatynyń basty nyshandary — Panfılovshylar saıabaǵyndaǵy Voznesensk sobory, óner qaıratkerleriniń eskertkishteri jáne «Kók Tóbe» panoramalyq saıabaǵynan qalaǵa qaraıtyn ádemi kórinis beınelengen. Rolıkte qolyna dombyra ustap, áýendetip turǵan qazaqtyń qara domalaq azamaty men qustardyń erekshe úni de baıqalady. Al qazaqstandyq jankúıerler elimizdi «Realdyq» fýtbolshylardyń áleýmettik paraqshasynan kóremiz dep oılamadyq deıdi.

— Qaıran, týǵan jerim! Real paraqshasynan Almatyny kóremin dep oılamadym. Endi bizdi mıllıondaǵan sheteldikter tanýda, — dep atap ótti olar.

Álemdik sport jankúıerleri úshin fýtbolshylar ǵana emes, elimizdiń ońtústik astanasy Almaty da basty nazarǵa ilikti. Sebebi rolıkten keıin qaladaǵy tarıhı ári týrıstik oryndardy kórgisi kelgen oqyrmandardyń sany artqan.

Posmotret etý pýblıkatsııý v Instagram

Pýblıkatsııa ot Real Madrid C.F. (@realmadrid)

Eske salsaq, 30 qyrkúıekte UEFA Chempıondar lıgasy negizgi kezeńiniń ekinshi týrynda qazaqstandyq «Qaırat» (Almaty) ıspanııalyq «Real Madrıd» (Ispanııa) komandasyn qabyldady. Alaıda «Qaırat» óz alańynda madrıdtik «Realdan» iri eseppen jeńildi.

Madrıdtik «Realdyń» bas bapkeri Habı Alonso Almatyda «Qaırat» fýtbol klýbyn 5:0 esebimen jeńgennen keıin oıyn týraly qysqasha pikir bildirdi.

Budan buryn «Qaırat» pen «Real Madrıd» kezdesýine álemdik BAQ pikiri qandaı ekenin bildik.