«Real Madrıdke» qarsy qupııa josparymyz bar – «Qaırat» bapkeri

ALMATY. KAZINFORM — ÝEFA Chempıondar lıgasynyń toptyq kezeńi aıasynda 30 qyrkúıek kúni Ortalyq stadıonda «Qaırat» pen «Real Madrıd» arasyndaǵy oıyn ótedi.

«Real Madrıd» búgin Almatyǵa tolyq quramda keldi. Match aldyndaǵy baspasóz máslıhatynda «Qaırat» fýtbol klýbynyń bas bapkeri Rafael Ýrazbahtın óz komandasy úshin bul oıynda turaqty oınaý mańyzdy ekenin atap ótti.

— «Real Madrıd» sekildi klýbta kemshilikter az. Biraq olardyń oıynyn taldaı otyryp, keı osal tustaryn taptyq. Biraq ony qalaı paıdalanamyz — ol bizge suraq. Qazir sizderge ony naqty aıta almaımyn, bul qupııa, erteń bárin ózderińiz kóresizder. Eger qolymyzdan kelse, onda durys paıdalanǵanymyz. Biraq qarsylas — myqty komanda, biz muny jaqsy túsinemiz jáne qıyn bolatynyn bilemiz. Degenmen, kórip-bilgenimizdi qoldanýǵa tyrysamyz, — dedi ol.

Sondaı-aq Rafael Ýrazbahtın aldaǵy oıynda jankúıerlerdiń jalyndy qoldaýyn kútetinin aıtty.

— Barlyq jaqsy nátıjelerimiz — bizdiń jankúıerlerge de baılanysty. Olar bizge el birinshiliginde jáne Chempıondar lıgasynda ótken matchtarda kóp kómektesti, biz muny jaqsy túsinemiz. Erteń de qoldaý kútemiz, — dedi bapker.

«Qaırat» qorǵaýshysy Egor Sorokın komandalyq jumys pen tártiptiń arqasynda nátıjege qol jetkizýge bolatynyn aıtty.

— Sebebi tártip — sheberlikti jeńedi. Biz óz múmkindikterimizdi paıdalanamyz. Sonymen qatar bizdiń qarý standartty jaǵdaılar bolady. Sol áreketterdiń arqasynda oń nátıjege qol jetkize alamyz jáne sol úshin bar kúshimizdi salamyz, — dep oıynshy.

Eske salaıyq, buǵan deıin «Real Madrıd» Almatyǵa kelgenin jazǵanbyz.