«Real Madrıd» jankúıerler 1 jyl kútken jańa fýtbolshysyn tanystyrdy
ASTANA. QazAqparat - Ispanııanyń «Real Madrıd» klýbynyń prezıdenti Florentıno Peres jankúıerler bir jyldan astam ýaqyt kútken brazılııalyq Vınısıýs Jýnıordy komandanyń jańa múshesi retinde tanystyrdy, dep habarlaıdy QazAqparat tilshisi klýbtyń resmı saıtyna silteme jasap.
Tanystyrý rásimine «Real Madrıdtiń» aty ańyzǵa aınalǵan oıynshysy brazılııalyq Ronaldo (Lýıs Nazarıo da Lıma) da qatysty.
Vınısıýs Jýnıor jas ta bolsa kelesheginen úmit kúttirgen daryn ıesi retinde tanylyp, 2017 jyldyń mamyr aıynda «Real Madrıd» ony Brazılııanyń «Flamengo» klýbynan 45 mıllıon eýroǵa satyp aldy. Biraq jasóspirimniń Ispanııaǵa qonys aýdarýy úshin 18-ge tolýyn, ıaǵnı 2018 jyldyń 12 shildesine deıin kútýge týra keldi.
Buǵan deıin ol «Flamengonyń» negizgi quramynda júrip, Brazılııanyń «A» serııasynda 62 oıynda 14 gol soqty. Fýtbol mamandary súıegi qatpaǵan jartylaı qorǵaýshy úshin bul jaqsy nátıje dep baǵalap otyr.
Ázirge jas fýtbolshyǵa qaı nómir beriletini belgisiz. Soǵan qaraǵanda klýb osy jazda taǵy da oıynshylar satyp alýy múmkin degen joramaldar bar.
Foto: twitter.com/realmadrid
