«Real Madrıd» Chempıondar lıgasynyń fınalyna shyqty

ASTANA. KAZINFORM - Fýtboldan UEFA Chempıondar lıgasynyń fınalynda kezdesetin komandalar anyqtaldy.

Jartylaı fınaldaǵy ekinshi jupta «Real Madrıd» (Ispanııa) men «Bavarııa» (Germanııa) kezdesti.

Oıyn basynan qos qarsylas tolassyz shabýyl uıymdastyrdy. Dese de olardyń eshqaısysy dittegen maqsatyna jete alǵan joq.

Kezdesý barysynda «Real Madrıd» sapynan Vınısıýs Jýnıor, Antonıo Rıýdıger, Federıko Valverde, Djýd Bellıngem syndy fýtbolshylar qaýipti shabýyldar uıymdastyrdy. Al,  germanııalyq klýbtan Djamal Mýsıala, Garrı Keın, Iozýa Kımmıh jasyl alańda jarqyldap kózge tústi. Soǵan qaramastan birinshi kezeńde tablodaǵy esepke ózgeris engen joq.

Ekinshi kezeńde de oıyn barysy dál osyndaı qarqynda órbip jatty. Kezekti shabýyldyń birinde «Bavarııa» sapynan Alfonso Devıs 68-mınýtta kózdegen nysanadan múlt ketken joq.

Odan keıin «Real Madrıd» tarazy basyn teńestirgen edi. Polshalyq tóreshi Shımon Martsınıak qarsylas klýbtyń aıyp alańynda ıspanııalyq fýtbolshylardyń tártip buzýyna baılanysty ony esepke alǵan joq. 

Ispanııalyq klýb oıyn sońyna taman eki gol soǵyp ketti. Ony Hoselý 88, 91-mınýtta óziniń enshisine jazdy. Osylaısha olar qarsylasynan 2:1 esebimen jeńdi.

Alǵashqy oıynda komandalar 2:2 esebine qanaǵat bildirgen bolatyn. 

«Real Madrıd» sońǵy on jylda bes márte fınalǵa shyǵyp, barlyǵynda jeńimpaz atanǵan. 

Aıta ketsek, budan buryn Germanııanyń «Borýssııa Dortmýnd» 11 jyldan keıin fınalǵa joldama aldy. Komanda jartylaı fınalda Frantsııanyń «Parı Sen-Jermen» klýbyn (1:0, 1:0) qapy qaldyryp ketti. 

Fınal 1 maýsymda Anglııanyń «Ýemblı» stadıonynda ótedi.