«Real Madrıd» — Chempıondar lıgasynyń 2024 jylǵy jeńimpazy
ASTANA. KAZINFORM — Fýtboldan UEFA Chempıondar lıgasynyń fınalynda «Real Madrıd» (Ispanııa) men «Borýssııa Dortmýnd» (Germanııa) kezdesti.
Kezdesý barysynda qos komanda birden belsendi qımylymen kózge tústi. Bir-biriniń qaqpasy mańynda jıi boı kórsetip, gol soǵatyn múmkindikti izdedi.
Birinshi kezeńde «Borýssııa Dortmýnd» oıynshylary jıi shabýyldady.
Keıbir sátte «Real Madrıd» qorǵaýshylary gol soǵýǵa múmkindik bermese, endigi bir sátte germanııalyq komanda fýtbolshylary kózdegen nysanany dál kózdeı alǵan joq.
Ekinshi kezeńde ıspanııalyq klýbtyń basymdyǵy baıqaldy. Olardyń tarapynan birneshe qaýipti shabýyl uıymdastyryldy.
Oıynnyń 74-mınýtynda «Real Madrıd» sapynan Danıel Karvahal gol soqsa, Vınısıýs Jýnıor 83-mınýtta qorytyndy esepti belgiledi.
Osylaısha ıspanııalyq klýb qarsylasynan 2:0 esebimen basym túsip, kýbokty tóbesine kóterdi.
«Real Madrıd» sońǵy on jylda bes márte fınalǵa shyǵyp, bárinde jeńimpaz atanǵan.
«Borýssııa Dortmýnd» komandasy 1997 jyly Chempıondar lıgasynda top jardy.
Al 2013 jyly fınalda «Bavarııa» komandasyna 1:2 esebimen jol bergen edi. Osylaısha «Borýssııa Dortmýnd» on bir jyldan keıin qaıtadan fınalǵa joldama aldy.
Eske salsaq, budan buryn Italııanyń «Atalanta» komandasy Eýropa lıgasynyń jeńimpazy atanǵan edi.
Sondaı-aq 1 maýsymda Konferentsııa lıgasynda «Olımpıakos» (Grekııa) chempıon boldy.
