«Real Madrıd» «Chelsı» komandasynan Kýkýrelıany $70 mln dollarǵa satyp aldy
ASTANA. KAZINFORM — «Real Madrıd» londondyq «Chelsı» komandasynyń qorǵaýshysy Mark Kýkýrelıanyń óz komandasyna resmı túrde aýysqanyn málimdedi. Kelisimshart quny bonýstardy qosa eseptegende 51,8 mln fýnt sterlıng (shamamen $70 mln) boldy, dep habarlaıdy BBC.
27 jastaǵy fýtbolshy ıspandyq klýbpen 6 jyldyq merzimge kelisimshart jasasty. Taraptar arasyndaǵy kelisimge 14 maýsym kúni qol qoıylǵan, al ol týraly resmı málimdeme kelesi kúni jasaldy. Transferdiń bazalyq somasy shamamen $64 mln-ǵa baǵalandy, odan basqa bonýstyq tólem retinde 5,8 mln dollar qarastyrylǵan.
Qazirgi tańda Kýkýrelıa Ispanııa quramasynyń sapynda 2026 jylǵy Álem chempıonatyna qatysyp jatyr. Ol 2022 jyldyń jaz aıynda «Chelsı» komandasyna ıspandyq «Braıtonnan» aýysty, ol joly transfer quny $85 mln bolǵan edi. Qorǵaýshy «Barselona» akademııasynyń shákirti, sondaı-aq osyǵan deıin birneshe márte Ispanııa chempıonatyna oralady degen aqparat taraǵan bolatyn.
Brıtandyq BAQ-tyń jazýynsha, fýtbolıst týǵan eline kóshkisi kelgen. Sondaı-aq ony madrıttik «Atletıko» jáne «Barselona» komandalary satyp alýdy kózdegen.
Kýkýrelıa klýb prezıdenti Florentıno Pereso qaıta saılanýy jáne Joze Moýrınıýnyń bas bapker qyzmetine taǵaıyndalýynan keıin bastalǵan «Real» quramyn aýqymdy jańartý úderisi aıasynda aýysyp jatyr.
Sondaı-aq, madrıdtikter «Manchester Sıtıdiń» jartylaı qorǵaýshysy Bernardý Sılva, «Inter» qorǵaýshysy Denzel Damfrıs jáne frantsýz qorǵaýshysy Ibraım Konatemen kelisimshartqa otyrý múmkindigin qarastyryp jatqan kórinedi.
Kýkýrelıanyń «Chelsı» komandasymen kelisimshartynyń aıaqtalýyna áli úsh jyl bar edi, biraq londondyq klýb madrıdtikterdiń usynysynan keıin, oıynshyny satý týraly sheshim qabyldady.
Ótken maýsym «Chelsı» úshin sátsiz bolǵanyn atap ótken jón. Komanda Anglııa chempıonatyn 10-shy orynmen aıaqtap, eýrokýbokqa qatysý múmkindiginen aıyryldy.
Eske sala keteıik, FIFA 2026 jylǵy álem chempıonatynyń júldelik qoryn $871 mln AQSh dollaryna deıin arttyrdy.
Budan bólek, álemdegi eń qymbat fýtbolshy belgili boldy
Arýjan Masımbaı
