«Real Madrıd» bas bapkeri Zınedın Zıdan qyzmetinen ketti
ASTANA. QazAqparat - «Real Madrıd» komandasynyń bas bapkeri Zınedın Zıdan búgin baspasóz máslıhatynda qyzmetinen ketetinin málim etti. Bul týraly sport basylymdary jarysa jazyp jatyr.
Arnaıy ótkizilgen baspasóz máslıhatynda bas bapker komandaǵa úsh jyldyq iri jetistikterden keıin úlken ózgerister qajet ekenin, sondyqtan kelesi maýsymda komandany jattyqtyrmaıtynyn aıtty.
«Kelesi maýsymda komandany jattyqtyrmaýǵa sheshim qabyldadym. Komandaǵa ózgeris, jańa ádisteme kerek», - dedi Zıdan.
Eske sala keteıik, 26 mamyr kúni Zıdan bastaǵan «Real Madrıd» ÝEFA Chempıondar lıgasynyń fınalynda «Lıverpýldi» jeńip, úshinshi jyl qatarynan Eýropanyń teńdessiz komandasy atanǵan bolatyn.
