«Real Madrıd» Almatyǵa keldi: jankúıerler áýejaıda qalaı qarsy aldy
ASTANA. KAZINFORM – Almaty áýejaıyna áıgili ıspandyq «Real Madrıd» fýtbol klýbynyń oıynshylary, bapkerler quramy jáne personaly bar ushaq qondy. Kazinform tilshisi jankúıerleri juldyzdardy qalaı qarsy alǵanyn kórip qaıtty.
Jankúıerler 28 qyrkúıek kúni tańerteńnen bastap-aq «Realdyń» charterlik tikeleı reıspen (IB 1401, Iberia áýe kompanııasy) Madrıdten Almatyǵa ushyp keletinin bilgen. Áýejaıdyń resmı tablosynda da qoný ýaqyty kórsetilip, adamdar súıikti klýbyn kútip jınaldy.
Sapar aldynda «Real Madrıd» fýtbolshylarynyń qara kók tústi klýbtyq sımvolıkasy bar sándi kostıým kıgen sýretterin jarııalaǵan edi.
Almaty áýejaıy ádettegideı adamǵa lyq toly boldy. Halyqaralyq reıster jolaýshylaryn qarsy alý aımaǵynda arnaıy kelgen jankúıerler jınaldy. Alaıda kópshilikti kútkendeı bolmady – «Real Madrıd» oıynshylary ádettegi esikten emes, ońtústik VIP arqyly shyqty.
Degenmen, VIP aımaǵynda jankúıer áldeqaıda kóp boldy. Olar qorshaýdyń ar jaǵynan ushaqty kórýge, keıin fýtbolshylardy shyǵaberiste qarsy alýǵa tyrysty. Uzaq kútken soń VIP-termınaldan shyqqan fýtbolshylar avtobýstar men kólikterge otyryp, qonaqúıge jol tartty.
Áýejaıdan qalaǵa qaraı baǵyt alǵan kezde adamdar jol boıyna tizilip, «Realdy» ystyq yqylaspen qarsy aldy.
Polıtsııa qoǵamdyq tártipti qamtamasyz etti.
Eske sala keteıik, 30 qyrkúıek kúni saǵat 21:45-te Almatydaǵy Ortalyq stadıonda «Qaırat» pen «Real Madrıd» arasyndaǵy Chempıondar lıgasy matchy ótedi.