«Real» basshylyǵy «Qaıratqa» qarsy match týraly pikir bildirdi

ALMATY. KAZINFORM – Madrıdtik «Realdyń» ınstıtýtsıonaldyq baılanystar jónindegi dırektory Emılıo Býtrageno almatylyq «Qaıratpen» aldaǵy kezdesýge qatysty pikirin aıtty.

Ol Realmadrid TV efırinde Chempıondar lıgasynyń toptyq kezeńine arnalǵan jerebe qorytyndysyna baǵa berip, bul týrnırdiń ádettegideı óte qıyn bolatynyn jáne qarsylastardyń deńgeıi joǵary ekenin atap ótti. Býtragenonyń aıtýyna qaraǵanda, matchtar teń dárejede ótedi dep josparlanyp otyr, sondyqtan «Realǵa» muqııat daıyndalý qajet.

Ol almatylyq «Qaıratpen» ótetin oıynǵa erekshe nazar aýdardy: madrıdtik klýb tarıhynda alǵash ret Almatyda óner kórsetpek.

– Biz buryn-sońdy olarmen («Qaıratpen» - avt.) oınap kórmedik ári olar óte alysta. Bul da bizdiń tyǵyz kestemizdi eskergende nazar aýdaratyn qosymsha faktor. Buny qabyldap, oıynǵa jaqsylap daıyndalýymyz kerek. Barlyq match mańyzdy bolmaq, al barlyq qarsylas erekshe yntalanǵan. Biz joǵary deńgeı kórsetip, barlyq usaq-túıekke muqııat bolýymyz qajet. Osyndaı erekshelikter matchty kópshiliktiń oılaǵanynan da qıyndatady, - dedi Býtrageno.

Eske salaıyq, almatylyq «Qaırat» alǵash ret óz tarıhynda Chempıondar lıgasynyń negizgi kezeńine shyqty. Toptyq kezeńge joldama alý úshin qazaqstandyq klýb slovendik «Olımpııany» (eki match qorytyndysy boıynsha 3:1), fındik «KýPS-ty» (3:2), slovaktyń «Slovanyn» (1:1, penaltı — 4:3), sondaı-aq shotlandııalyq «Seltıkti» (0:0, penaltı — 3:2) jeńdi.

Keshe, 28 tamyzda «Qaırattyń» fýtboldan Chempıondar lıgasy negizgi kezeńindegi qarsylastary anyqtaldy.

Almatylyq klýb endi «Real Madrıd» (Ispanııa), «Inter» (Italııa), «Arsenal» (Anglııa), «Brıýgge» (Belgııa), «Sportıng» (Portýgalııa), «Olımpıakos» (Grekııa), «Pafos» (Kıpr), «Kopengagen» (Danııa) klýbtarymen oınaıdy.