«Real» fýtboldan klýbtyq álem chempıonatynda jeńiske jetti
ASTANA. QazAqparat - Madrıdtik «Real» fýtboldan klýbtyq álem chempıonatynyń jeńimpazy boldy.
Týrnır Japonııada ótti, dep habarlaıdy QazAqparat Bı-Bı-Sı-ge silteme jasap.
ÝEFA Chempıondar lıgasynyń byltyrǵy jeńimpazy fınaldyq oıynda «Kasıma Antlers» japondyq klýbynan basym túsip, 4:2 esebimen jeńiske jetti. Sońǵy eki dopty «Real» qosymsha ýaqytta saldy. Matchta esepti 9-ynshy mınýtta «Real» oıynshysy Karım Benzema ashty. Biraq taımnyń sońyna qaraı Gaký Sıbasakı esepti teńestirdi. Ekinshi taımnyń 52-inshi mınýtynda ol ekinshi golyn soqty. Kóp uzamaı «Kasımanyń» qorǵaýshysy «Real» oıynshysyn qaǵyp ketip, tóreshi olarǵa penaltı taǵaıyndady. Penaltıdi Krıshtıaný Ronaldý júzege asyrdy. 97-inshi jáne 104-inshi mınýttarda Ronaldý taǵy eki dop saldy.
Buǵan deıin Krıshtıaný Ronaldý jyldyń úzdik fýtbolshysyna beriletin -«Altyn dop» syılyǵyn alǵany habarlanǵan bolatyn.
