«Real» 34-inshi ret Ispanııa chempıony atandy
NUR-SULTAN. QazAqparat – Madrıdtiń «Real» fýtbol klýby mezgilinen buryn Ispanııa chempıony atandy, dep habarlaıdy QazAqparat.
Realdyqtar sońǵy oıynnyń aldyndaǵy matchta, ıaǵnı 37-inshi týrda óz alańynda «Vılıarreal» komandasynan 2:1 esebimen basym túsip, upaı sany boıynsha ekinshi orynda kele jatqan «Barselonanyń» chempıondyqtan úmitin úzdi.
Sońǵy týrdyń aldynda «Real» 86 upaı jınady, «Barselonada» - 79.
«Real» úshin bul 34-inshi tıtýl. Koroldik klýb osy kórsetkish boıynsha rekordshy («Barselona» ulttyq chempıonatta 26 ret utqan).
Madrıdtikter Chempıondar lıgasyndaǵy jeńister sany boıynsha da (13) rekordshy bolyp esepteledi.
Buǵan qosa, «Real» 19 ret Ispanııa kýbogynyń ıegeri atandy, 11 ret Ispanııa sýperkýbogyn enshiledi. Al halyqaralyq arenada komanda eki ret ÝEFA kýbogyn, sondaı-aq tórt retten ÝEFA sýperkýbogyn jáne klýbtyq álem chempıonatyn jeńip aldy.
Aıta ketken jón, osy maýsymda «Realdyń» bapkeri osy klýbtyń burynǵy oıynshysy Zınedın Zıdan boldy.
