RBK isi: kúdiktiniń kúıeýi Ertaevtyń shyrǵalańǵa qalaı tartqanyn aıtty
ALMATY. QazAqparat - «Alma TV» JShS aktsııasynyń tolyq ıegeri «Asset Invest» JShS basshysy Tatıana Paktyń kúıeýi Evgenıı Pak Jomart Ertaevtyń bylyǵyna qalaı kiriskenderin aıtyp berdi, dep habarlaıdy QazAqparat tilshisi.
Qylmystyq iste kýáger retinde ótip jatqan Evgenıı Paktyń sózine qaraǵanda, onyń jary «Alma TV» JShS basshysy bolǵandyqtan, baspasóz máslıhatyn ótkizip otyrǵanyn aıtty.
Jomart Ertaev «Alma TV» JShS 100 paıyz aktsııasynyń ıegeri Tatıana Paktan «Ordabasy Komıýnıkeıshens» JShS-ǵa úles bólýin suraǵan.
«Jomart Ertaev bizge osylaı dep qolqa salǵanda, biz bas tarta almadyq. Sebebi, ol kezde qatynasymyz jaqsy bolatyn. Sol úshin bul mámilege kelisim berdik», - dedi Evgenıı Pak Almatyda ótken baspasóz máslıhatynda.
Mámile júzege asqan soń erli-zaıyptylar kompanııanyń RBK banki aldynda 30 mlrd qaryzy bar ekenin bilgen.
Bul nesıeni Jomart Ertaev aldynda alǵan eken.
Sotqa deıingi tergeý basynda Ertaev Tatıanany kompanııa oǵan tıesili emestigin aıtýǵa kóndirgen.
«Ol Tatıana ekeýmizdi kompanııany bólip tóleý tásilimen satyp aldyq dep aıtýǵa kóndirdi. Meniń áıelim tergeý ornynda 6 aı otyrdy. Osy ýaqyt aralyǵynda Jomart Ertaev Tatıanany shyǵaryp alatynyn aıtyp keldi», - dedi Evgenıı Pak.
Alaıda, Ertaev Pak otbasyna kómek bere almaǵan. Tek qana BAQ betterinde reıderlik tartyp alý bolǵanyn aıtqan.
Evgenıı Pak Ertaevtyń osylaısha problemadan qutylmaq bolǵanyn topshylaıdy.
Sonymen qatar, Paktyń aıtýynsha, Ertaev onyń úıine Máskeýge óziniń qaýpsizdik qyzmetiniń jigitterin jiberip, qoqan-loqqy jasatqan. Sosyn Paktyń telefonyn tartyp alǵan, Whatsapp hattaryn oqyǵan.
Er adam Whatsapp hattaryn qaıta qalpyna keltirip, baspasóz máslıhaty barysynda kórsetti.
«Ol bizdi paıdalandy. Biz birshama ýaqyt reıderlik tartyp alý bolǵan shyǵar dep senip júrdik. Sonyń kesirinen Asset Invest bankrotqa ushyrap, qaryzǵa belshesine batyp qaldy», - dedi E. Pak.
Aıta ketý kerek, QR bas prokýratýrasynyń vedomstvoaralyq tergeý toby, QR UQK, sybaılas jemqorlyqqa qarsy ulttyq bıýro «Bank RBK» bankinen asa iri kólemde qarjy urlanýyna qatysty tergeý isin bastady.
Qylmystyq is aıasynda Jomart Ertaevtyń «Alma TV» kabeldi telearna operatorynyń aktsııasyn satyp alý úshin asa iri kólemde qaryz alýy tekserilip jatyr.
