Raıymbek batyrdyń sońǵy soǵysy bolǵan jerge eskertkish taqta ornatyldy
Almaty oblysynyń Panfılov aýdany ortalyǵy – Jarkent qalasy men osy óńirdegi eń iri eldi meken – Kóktal aýylyn jalǵaıtyn kúre joldyń boıyndaǵy Túrgenkent tarıhı orny bar. Kenttiń orny, aınala qorshaǵan dýaly, qorǵan túbinen dushpan shabýylyna qarsy qazylǵan sý toltyratyn ordyń silemi qazirdiń ózinde aıqyn kórinip jatyr. Sonaý 1856 jyly Qashqarııaǵa jasaǵan áıgili sapary kezinde zertteýshi jıhankezi Shoqan Ýálıhanov óz qolymen syzǵan Jarkent óńiri kartasynda bul kenttiń orny naqty kórsetilip, ataýy da anyq jazylǵan.
Bul jerde talaı-talaı oqıǵalar oryn alǵany tarıhtan belgili. Sonyń biri - «Aqtaban shubyryndy» zobalańynyń aqyrǵy shaıqasy. XVIII ǵasyrdyń ekinshi jartysynda Raıymbek batyrdyń qoly qalmaqtardy osy aradan Qytaımen shekaradaǵy qazirgi Qorǵas ózeninen asyra qýyp tastaıdy. Bul shaıqasqa Sýannyń ataqty Aralbaı, Sataı, Bólek batyrlary da qatysyp, týǵan jer, týǵan elin basqynshylardan azat etýge atsalysqan. Raıymbek batyr osy urysta ýly jebeden jaralanǵan degen derekter bar. Bul týraly jazýshy jerlesimiz, Memlekettik syılyqtyń laýreaty Beksultan Nurjekeulynyń zertteý maqalalarynda jazdy.
Kúre joldyń boıyna ornatylǵan kórnekti taqtaǵa osynaý tarıhı jaǵdaı jóninde aıshyqty etip jazylǵan. Eskertkish taqtany aýdandaǵy «Meıirim» mekemesiniń basshysy Amantaı Raev bastamashy bolyp ornatqan.
