Raıymbek batyr eskertkishi eńseli el ekendigimizdi, eldigimizge saı erlerimizdiń bar ekenin taǵy bir ret tanytatyn sát - A. Esimov
ALMATY. 7 jeltoqsan. QazAqparat - Bul atamekenin jońǵar basqynshylarynan azat etken dańqty qolbasshy Raıymbek batyrǵa ornatylǵan eskertkish.
Qala ákimi Ahmetjan Esimov búgin Raıymbek dańǵylynyń boıynda turǵyzylǵan eńseli jańa eskertkishtiń ashylý rásiminde osylaı aıtty.
«Osy shara bizdiń eńseli el ekendigimizdi, eldigimizge saı erlerimizdiń bar ekenin taǵy bir ret tanytatyn sát. Sońǵy 20 jylda elimizdiń ekonomıkalyq jaǵdaıymen birge, tilimiz ben dinimiz, rýhymyz ben mádenıetimiz de damý ústinde. Elbasymyzdyń basshylyǵymen ómirge kelgen «Mádenı mura» baǵdarlamasy tarıhymyzdy túgeldeýge múmkindik berdi. Ańyz tóńireginde aqıqat shejire, áńgime astarynda shyndyq jatady»,- deıdi A.Esimov. Shahar basshysynyń aıtýynsha, osydan bir jyl buryn paıdalanýǵa berilgen Almaty metrosynyń basty beketi Raıymbek batyr esimimen atalady. Búgin mine metro beketine jaqyn jerde óziniń esimimen atalatyn dańǵyl boıynda Raıymbek batyr eskertkishi boıt kóterip otyr. Biz namysyn jaýǵa bermegen, naızasyn kekke qaıraǵan batyrlar men el kósemderiniń urpaǵymyz. Sonyń biri qazaq eliniń jaýyngerlik uranyna aınalǵan Raıymbek batyr. Ol 17 jasynda jońǵar basqynshylaryna qarsy kúreste erlik kórsetip batyr atanǵan. Qalmaqtyń - Badam, Qoryn, Aǵanas, Seker syndy han, noıan, batyrlaryn jekpe-jekte jeńip, Qarataý óńiri men Jetisýdy jaýdan azat etýge basshylyq jasaǵan.
