Raıymbek aýdany bir gektardan 50 tonnaǵa deıin kartop jınap jatyr
TALDYQORǴAN. QazAqparat - Bıyl Almaty oblysynyń Raıymbek aýdanyna Gollandııadan kartoptyń «Sante» jáne «Agrııa» tuqymdary ákelindi. Sharýalardyń asta-tók ónim jınap jatqany - osy sorttar. Bir gektardyń berekesi 50 tonnaǵa deıin jetti, dep habarlaıdy QazAqparat tilshisi.
Kartoptyń gektarynan 300, keı jerlerden 500 tsentnerge deıin ónim alynýda. Biraq bul jınalǵan kartop naryqqa shyǵarylmaıdy. Kelesi jylǵa sharýalarǵa tuqym retinde taratylady. Prezıdent Nursultan Ábishuly Nazarbaevtyń Jetisýdaǵy aýyl sharýashylyǵynyń áleýetin arttyrý jónindegi tapsyrmasyna sáıkes, osy baǵytta sharýalarǵa memleketten jan-jaqty qajetti qoldaý kórsetilip jatyr. Bıyl aýdanda eki servıstik ortalyq qurylyp, qajetti kombaın, traktor jáne basqa da jabdyqtar alyndy.
«Elbasy Joldaýynda da, ózderińiz bilesizder, shaǵyn jáne orta kásiporyndarǵa aqshany kóptep bólý týraly aıtyldy. 87 mıllıonǵa kúzgi jıyn-terim naýqanyna qajet tehnıkalardy aldyq. Bári der kezinde keldi. Qazir jumys istep jatyr», - deıdi servıstik-daıyndaý ortalyǵynyń dırektory Marat Manapuly.
Raıymbek aýdanynda ósirilgen kartopqa ınvestorlar da qyzyǵýshylyq tanytyp otyr. Aýdannyń geografııalyq ornalasýy jáne klımattyq jaǵdaıy «frı» jáne «chıps» óndirýge qajet kartopty ósirýge múmkindik beredi.
«Munda jer teńiz deńgeıinen 1800 metr joǵary ornalasqan. Bul mańda, barlyqtaryńyz bilesiz, kolorad qońyzy sııaqty zııankester joq. Aýrýǵa tózimdi osyndaı kartop tuqymyn ákelgendikten, osyndaı mol ónim alyp otyrmyz», - deıdi Raıymbek aýdanynyń ákimi Jolan Omarov.
Almaty oblysynyń jańadan qurylǵan Raıymbek aýdanynda kartop óndirisi osylaısha jandanyp keledi. Aýdan «Narynqoldyń kartoby» degen brend qalyptastyryp, bolashaqta Almaty men Astana qalalaryn, Almaty oblysyn sapaly ónimmen qamtamasyz ete alatyndaı jaǵdaıǵa jetýdi mejelep otyr. Bıyl narynqoldyq sharýalar qoımaǵa 2500 tonnaǵa jýyq kartop bastyrýǵa nıettenip otyr.
