Raıymbek Batalov memorgandardyń júgeri óndirýshiler dabylyna der kezinde den qoımaǵanyn synady
ASTANA. KAZINFORM – «Atameken» ulttyq kásipkerler palatasynyń tóralqa tóraǵasy Raıymbek Batalov Saýda jáne ıntegratsııa mınıstrliginiń alqa májilisinde júgeri óndirýshilerdiń dabylyna vedomstvonyń der kezinde den qoımaǵanyn aıtyp, synady.
«Biz qazir bıznes sapaly saraptamanyń tapshylyǵynan qıyndyqtar kórip otyrǵanyn kórip júrmiz. Ulttyq palata retinde bul máseleni QazTrade sııaqty qurylymdarmen jeke qaraý kerek dep topshylaımyz. Naqty keıs te bar. Júgerini alaıyq, ónimdilik boldy, baǵa qulap, satý qıyndady. Astyqpen de osylaı boldy. Sata almaı otyrmyz. Osy jerden suraq týady. Bizdiń QazTrade sııaqty ınstıtýttar, qaýymdastyqtar, keńester qaıda? Jalpy alǵanda, ózimiz qandaı da bir saraptama jasap jatyrmyz. Biraq saýda salasyna jaýapty organ retinde sizderden de kómek kerek. Taldaýlar negizinde ár jaǵdaıǵa ıkemdi den qoıý qajet sııaqty. Birinshi kezekte, trendter analızi jetispeıdi. Tym bolmaǵanda Qazaqstanda óndiriletin taýarlardyń suranysyn naqty taldaı alýymyz kerek. Ósimdik sharýashylyǵy, astyq óndirisi, bul joly júgeri óndirisi osydan zardap shekti. Bizge mundaıda jedel, jyldam sheshim kerek – uzaq ýaqyt ónimdi saqtap otyra almaımyz. Tek osy maýsymǵa tarıf máselesin sheship berse degen sııaqty ǵoı. «Azyq-túlik kelisimshart korporatsııasymen» kórshiles Qytaı naryǵymen jyldam kelisip, túıtkildi sheshse bolar edi. Otandyq bıznestiń tynysy osyndaı máselelerdi qanshalyqty jyldam sheshkenimizge baılanysty», - dedi palata basshysy.
Sondaı-aq, ol bıznes úshin tehnıkalyq retteý, standarttaý máselesi de óte sezimtal ekenin atap ótti.
«Mundaı retteý tómennen joǵary qaraı júrý kerek. Bizde sál-pál olaı emes. Ázirlengen standarttardyń jartysynan kóbi qoldanylmaıtynyn kórip júrmiz. Bul jerde tásilderdi qaıta qaraý kerek shyǵar. Taýardyń shyqqan jeri týraly sertıfıkat máselesi, STKZ, ındýstrııalyq sertıfıkat, otandyq óndirýshiler tizilimi boıynsha, ashyǵyn aıtqanda, ókinishke qaraı, ahýal túbegeıli ózgerip jatqan joq. 5 taýar boıynsha erejeler qaıta qaralǵan bolatyn. Biz qańtarda №454-buıryq boıynsha, óndiristi jergilikti orynǵa shoǵyrlandyrý deńgeılerin engizý boıynsha qaıtalap hat joldadyq. Qazir Úkimette, Premer-Mınıstr máseleni tipti tótesinen qoıyp otyrǵanyn kórip jatyrmyz. Qazir júrgizilip jatqan jumys múldem kóńil kónshitpeıdi. Týra aıtsam, keshirim suraımyn. Biraq bul jumysqa múldem kóńil tolmaıdy», - dedi Raıymbek Batalov.
