Raıymbek Batalov kásipkerlerdiń basty problemasyn atady

ASTANA. KAZINFORM – «Atameken» ulttyq kásipkerler palatasynyń basqarma tóraǵasy Raıymbek Batalov otandyq kásipkerlik salasy aldyndaǵy basty máseleni atady.

«Jaqynda Premer-mınıstrdiń qatysýymen ótken shaǵyn jáne orta bıznes forýmynda jer máselesi talqylanǵan basty 3 máseleniń qataryna endi. Memleket basshysy jerge ınvestıtsııa quıǵan fermerlerden jerdi alyp qoıý máselesi týyndamaýy kerek dep birneshe ret aıtty. Búginde jer máselesine qatysty 100-den astam aryz-shaǵym tirkeldi. Biz bul máseleni Bas prokýratýramen talqylaımyz jáne vıtse-premer Serik Jumanǵarın deńgeıinde qoldaý tabady», - dedi Raıymbek Batalov elordada bıznes qaýymdastyqpen ótken kezdesý barysynda.

Onyń aıtýynsha, kásipkerlerdiń máselesin quzyrly organdar men ulttyq palatanyń birlesip qarastyrýy  ońtaıly qadam.

«Jyl boıy óńirlik palatalar qala ákimdigimen birlesip, buryn kóterilgen problemalyq máselelerdi pysyqtap jatyr. Ótken jyly 50-den astam máseleni júıelep, sheshý múmkindigi týdy. Degenmen tez áreket etý kerek problemalar shyǵyp jatady. Búgingideı kezdesýler memlekettik organdar men ákimdiktiń aralyq qorytyndylar shyǵarýy úshin mańyzdy. Elorda ákiminiń jeke qatysýy bızneske qatysty máselelerdi sheshýdi jedeldetedi», - deıdi ol.

Aıta keteıik, Atameken ulttyq kásipkerler palatasynyń basqarma tóraǵasy Raıymbek Batalov pen elorda ákimi Jeńis Qasymbek astanalyq bıznes qaýymdastyǵy ókilderimen kezdesip, sala máselelerin birlesip qarastyryp jatyr.

Osyǵan deıin elorda ákimi turǵyn úı salýǵa ýaqytsha shekteý qoıý týraly máselege jaýap berdi.