Ravıl Ryspekov: Bala muǵalimniń energııasyn boıyna sińiretinin umytpaýymyz kerek
QazAqparat tilshisi búgingi Muǵalimder kúnine oraı 2021 jylǵy respýblıkalyq «Úzdik pedagog» baıqaýynyń jeńimpazymen suhbat quryp kórdi.
- Týyp-ósken jerińiz jaıly aıtyp berseńiz.
- Kindik qanym 1988 jyly Shyǵys Qazaqstan oblysy Borodýlıha aýdanynda tamdy. 2009 jyly Semeı memlekettik pedagogıkalyq ınstıtýtyn támámdap, N.Ostrovskıı atyndaǵy orta mektepke fızıka pániniń muǵalimi bolyp jumysqa ornalastym. Sol ýaqyttan beri oqýshylardy bilim nárimen sýsyndatyp kelemin. 2016 jyly Shákárim atyndaǵy memlekettik ýnıversıtetin aıaqtap, fızıka mamandyǵy boıynsha pedagogıka ǵylymdarynyń magıstri atandym.
- Osy mamandyqty tańdaýyńyzǵa ne túrtki boldy ?
- Ustazdyq - eń asyl mamandyqtardyń biri. Muǵalimder óskeleń urpaqty álemniń sanalýan qyzyqtarymen tanystyryp, bilimge degen qyzyǵýshylyǵyn oıatyp, shyǵarmashylyǵyn shyńdaıdy. Ýnıversıtet qabyrǵasynda oqyp júrgenimde mektepten is-tájirıbeden óttim. Balalarǵa sabaq bergen ózime qatty unady. Qolymnan keletinin de sezdim. El arasynda 1 jyl muǵalim bolǵan adam ómir boıy ustazdyq etedi degen sóz bar. Mine, sóıtip osy mamandyqtyń ıesi atandym.
- Sizdi fızıka páni nesimen qyzyqtyrdy ?
- Jalpy fızıka bul – tabıǵattaǵy qarym-qatynastardy, zańdylyqtardy zertteıtin ǵylym. Bala kúnimnen fızıkaǵa degen qyzyǵýshylyǵym joǵary boldy. Oǵan osy pánnen sabaq bergen ustazymnyń úlesi zor. Ár sabaqty ártúrli etip qyzyqty ótkizetin. Óse kele ózimdi osy jolǵa baǵyttaǵym keletinin túsindim.
- Tálimińizdi kórgen oqýshylaryńyz qandaı jetistikterge jetti ?
- 2016-2017 jyldary shákirtim Veronıka Groza «Fızıka» páninen aýdandyq olımpıadada 1 oryn ıelendi. Ádiljan Eginbekov 2019 jyly «Shapaǵat» grafıkalyq sýretshilerdiń respýblıkalyq baıqaýynyń oblystyq kezeńinde 2 oryn aldy. Ádil Satov sol jyly jaratylystaný-matematıka pánderi boıynsha prezıdenttik olımpıadada 11 synyp oqýshylary arasyndaǵy aýdandyq kezeńde 2 orynǵa jaıǵasty. Gúlsim Smaǵulova 2020 jyly IQanat olımpıadasynyń 2 týrynda jeńimpaz boldy. Al bıyl oqýshym Tatıana Aleksandrova jalpy bilim beretin pánder boıynsha respýblıkalyq olımpıadanyń fızıka páninen oblys boıynsha 3 oryn ıelendi. Semeı polıgony jabylýynyń 30 jyldyǵyna arnalǵan «Tabıǵatty aıala» jas ólketanýshylar, ekologtar men natýralısterdiń oblystyq forýmynda Darıǵa Esimbekova «Densaýlyq jáne qorshaǵan orta» nomınatsııasy boıynsha 1 oryndy jeńip aldy.
- Jaqsy ustazdyń boıynda qandaı qasıet bolý kerek dep oılaısyz?
- Birinshi kezekte eńbekqorlyq qajet. Kez kelgen mamandyq ıesi óz jumysyn jaqsy kórýi tıis. Sonda ǵana ol berilip, jan tánin salyp eńbek etedi. Oqýshylarmen baılanys ornata bilý, jaıdary minez, qajet kezde talapshyldyq tanytý – ustazdyń boıynda bolýy tıis qasıetter. Sabaqty barynsha qyzyqty ótkizgen durys. Bala muǵalimniń energııasyn boıyna sińiretinin umytpaýymyz kerek. Sol úshin pedagog óz qyzmetine asqan jaýapkershilikpen qarap, únemi bilimin jetildirip otyrýy qajet.
- Áńgimeńizge kóp rahmet!