Raýshan Aımurzaeva: Jańa Qazaqstandy birge qurýǵa daıynmyn

AQTAÝ. QazAqparat - «Amanat» partııasynyń oblystyq máslıhat depýtattyǵyna úmitkerler arasynda jańa esimder kóp. Olar buryn saıasatqa aralaspaǵan, biraq qoǵam janashyrlary. Sonyń biri - Raýshan Aımurzaeva, dep habarlaıdy QazAqparat.

Ol osy joly partııaǵa Jańa Qazaqstannyń irgesin birge qalaýǵa bel býyp kelgenin aıtady.

- Men osy kúnge deıin saıasatqa aralasqan emespin. Memleket basshysy Qasym-Jomart Toqaev «Memlekettigimizdiń jańa dáýiri bastaldy. Maqsatymyz – Ádiletti Qazaqstandy qurý» dep aıtqan bolatyn. Prezıdentimizdiń osy sózi meniń saıasatqa kelýime sebep boldy. Men Mańǵystaýdyń týmasymyn. Balalarym da osy jerde balabaqsha, mektepke barady. Biz de ózgeler sekildi medıtsınalyq kómekke júginemiz. Dúkendegi azyq-túlikti satyp alamyz. Biraq oblysta mektep, balabaqsha tapshylyǵy, medıtsınalyq kómektiń qoljetimsizdigi, azyq-túlik baǵasynyń kúnnen-kúnge qymbattaýy, jemqorlyq jaılaýy meni alańdatady. Sondyqtan zańger retinde osy máselelerdi sheshýge úlesimdi qosý mindetim dep bilemin. Sondaı-aq balalarymnyń qýatty, baı, ádiletti Qazaqstanda ómir súrgenin qalaımyn. «Amanat» partııasynyń saılaýaldy baǵdarlamasynda men ataǵan máselelerdiń sheshý joldary túgel qamtylǵan. Búgingi kúni halyqtyń áleýmettik osal toptaryna jatatyn azamattardyń jaǵdaıyn jaqsartýǵa arnalǵan memlekettik baǵdarlamalar da jeterlik. Biraq sonyń keıbiri halyqqa tıisti deńgeıde jetpeı jatyr. Sol máseleniń sheshilýine de zań júzinde óz úlesimdi qosqym keledi,-deıdi Raýshan Aımurzaeva.

Raýshan Nurǵalıqyzy 20 jyldan beri jeke kásipker. Negizgi mamandyǵy – zańger.

Ol Mańǵystaý oblysy Aqtaý (Shevchenko) qalasynda, kópbalaly, jumysshylar otbasynda dúnıege kelgen.

Búginde ol súıikti jar, 3 balanyń anasy. Qazaq, orys, aǵylshyn jáne túrik tilderin erkin meńgergen.

«ASSYL TRANS GROUP» JShS quryltaıshysy. «Halyq alǵysy» QR Prezıdentiniń medaliniń ıegeri, «Dańq juldyzy» ordenimen marapattalǵan.

Búgingi kúni aýyl turǵyndaryna, jaǵdaıy tómen, muqtaj otbasylarǵa jáne tarıhı otanyna oralǵan qandastarǵa kásip bastaý turǵysynan zańgerlik, salyqtyq jáne basqa da máseleler boıynsha keńes beredi.

- Bul meniń týǵan ólkemniń órkendeý jolynda atqarǵan jumysymnyń az ǵana bóligi, alda qoǵamymyzdyń ıgiligi úshin eńbek etýge árkez daıynmyn! Ustanymym – áleýmettik ádildik jáne qorshaǵan ortamnyń órkendeýine úles qosý,-deıdi Raýshan Aımurzaeva.

Mańǵystaý oblystyq máslıhaty depýtattarynyń saılaýynda partııalyq tizimdi usynǵan «AMANAT» partııasy saılaý qorynyń qarajatynan tólendi.