Raýl Kastro Qazaqstan Prezıdentiniń saıası kóregendigine tańǵalady - Kýba Elshisi
ASTANA. QazAqparat - Búgin Aqordada Qazaqstan Prezıdenti Nursultan Nazarbaevqa senim gramotasyn tapsyrý barysynda Kýba Elshisi Emılıo Pevıda Pýpo Raýl Kastronyń ystyq yqylasyn da jetkizdi, dep habarlaıdy QazAqparat.
«Prezıdent Nursultan Nazarbaevqa Kýba Úkimeti men halqynyń, onyń ishinde Kýba Respýblıkasy Memlekettik keńesi men Mınıstrler keńesiniń tóraǵasy, armııa generaly Raýl Kastronyń sálemin jetkizdim. Raýl myrza Qazaqstan Prezıdentimen tanys ári onyń strateg, Ult kóshbasshysy retindegi batyldyǵy men saıası kóregendigine tańǵalady, Gavanaǵa saparyn jylylyqpen eske alady», - dedi senim gramotasyn tapsyrǵannan keıin BAQ ókilderine suhbat bergen Elshi.
Emılıo Pevıda Pýpo eki eldiń arasy alshaq bolǵanymen, halyqtardyń ıgiligi úshin ózara tıimdi yntymaqtastyqty damytýǵa mol múmkindik bar ekendigin basa aıtty.
«Osynaý saltanatty sátte Kýba men Qazaqstan arasyndaǵy ekijaqty baılanystardy nyǵaıtýǵa jiberilgen buǵan deıingi Elshi júzege asyrǵan tamasha jumystardy jalǵastyrýdy ózimniń mindetim sanaımyn. Elshi bolýdyń jaýapkershilik júgi aýyr. Biraq, men ony zor rızashylyqpen qabyldaımyn. Kýba Qazaqstan Táýelsizdigin eń birinshi moıyndaǵan elderdiń biri jáne tyǵyz dıplomatııalyq qarym-qatynas ornatty Kýba Úkimeti úshin Qazaqstan Respýblıkasymen bul baılanystardy damytý aıryqsha mańyzǵa ıe. Bizdiń densaýlyq saqtaý, bilim, sport, mádenıet, bıotehnologııa, farmatsevtıka salalaryndaǵy tájirıbemiz mol. Biz qazaq halqymen jetistikterimizdi zor qanaǵattanýshylyqpen bólisemiz», - dedi ol.
Aıta keteıik, Emılıo Pevıda Pýpodan senim gramotasyn qabyldaǵannan keıin Elbasy Nursultan Nazarbaev Qazaqstan Kýba memleketimen ekijaqty yntymaqtastyq aıasyn keńeıtýge múddeli ekendigin aıtqan bolatyn.
«Sońǵy jyldary Qazaqstan-Kýba qarym-qatynastary aıtarlyqtaı jandanyp kele jatyr. Men 2017 jyldyń sáýirinde alǵash ret Kýbaǵa resmı saparmen bardym. Kýba basshylyǵymen ótken kelissózder barysynda biz eki eldiń arasyndaǵy yntymaqtastyqtyń jańa perspektıvalaryn anyqtadyq. Elderimizdiń saýda ekonomıkalyq saıası yntymaqtastyǵyn nyǵaıtý úshin naqty jumystardy jalǵastyrý qajet», - dedi Nursultan Nazarbaev.
