Raýan Kenjehanuly: Abaı – halqymyzdyń rýhanı baıraǵy

NUR-SULTAN. QazAqparat - Abaı – ýaqyt pen qorshaǵan ortadan joǵary kóterilip, jalpy adamzattyq uly qundylyqtar deńgeıine jetken rýhanı baıraǵymyz. «Ulttyq aýdarma bıýrosy» qoǵamdyq qorynyń atqarýshy dırektory Raýan Kenjehanuly osyndaı pikir aıtty, dep habarlaıdy QazAqparat tilshisi.

«Meniń oıymsha, Abaı kúnin belgileýge, Abaıdyń rólin aıqyndaýǵa memlekettiń, Prezıdenttiń nazar aýdarýy óte durys jáne qajet dúnıe. Ókinishtisi, Abaı elimizdegi bas aqyn ekeni týraly ǵana aıtylatyn kezeń de bolǵan. Al shyn máninde Abaı - ýaqyt pen qorshaǵan ortadan joǵary kóterilip, jalpy adamzattyq uly qundylyqtar deńgeıine jetken rýhanı baıraǵymyz. Abaı óz týyndylary arqyly máńgilik qundylyqtar týraly aıtyp, qalaı ómir súrý kerektigi týraly jol kórsetken. Ol ar-ojdandy joǵary qoıyp, adamzattyń bárin baýyryndaı jaqsy kórý kerektigin nasıhattady. Onyń ulylyǵy osynda», - deıdi Raýan Kenjehanuly.

Onyń aıtýynsha, Ulttyq aýdarma bıýrosy Abaıdyń shyǵarmalaryn 10 tilge aýdarý jumysyna basshylyq etýde.

«Jaýapkershilikti sezine otyryp, aýdarmanyń sapasy jaqsy bolýy úshin qoldan kelgennniń bárin jasadyq. Jumysqa 10 til men mádenıetin jaqsy biletin bedeldi basylym uıymdary tartyldy. Bul jumys 10 memlekettiń astanasynda tájirıbeli ǵalymdar men lıngvıst, ádebıettanýshylardyń kómegimen júzege asty. Jumys aıaqtalyp qaldy. Jobaǵa qatysýshylardyń bári Abaı muralary arqyly Qazaqstan mádenıetin nasıhattap júrgen bedeldi adamdar», - deıdi ol.