Ratsıon jańartyldy: Áskerı tamaqtyń quny men kalorııasy artty
ASTANA. KAZINFORM — 2026 jylǵy 1 qańtardan bastap Qazaqstan Respýblıkasy Qarýly Kúshterindegi jalpyáskerı azyq-túlik úlesiniń quny 900 teńgege ósip, 3 150 teńgeni qurady, dep habarlaıdy Qorǵanys mınıstrliginiń baspasóz qyzmeti.
Bul sheshim Májilis depýtattarynyń, «Atameken» UKP ókilderiniń, Qarjy mınıstrliginiń jáne kúshtik qurylymdardyń birlesken jumysynyń nátıjesinde qabyldandy.
Vedomstvoaralyq top Qarýly Kúshterdiń, basqa da áskerler men áskerı quralymdardyń áskerı qyzmetshilerin tamaqtandyrýdy uıymdastyrý úshin qosymsha bıýdjet qarajatynyń qajettiligin eseptedi.
2025 jylǵy tamyz aıynda respýblıkalyq bıýdjet komıssııasy azyq-túlik sebetiniń quramy men naryqtaǵy aǵymdaǵy jaǵdaıdy eskere otyryp, qosymsha qarjy bólý týraly sheshimdi maquldady.
— Jalpyáskerı úles 48 túrli ónimnen turady, onyń jalpy kalorııalyǵy — 4 321 kkal. Ratsıonǵa sıyr jáne qus eti, balyq, kúrish, qaraqumyq, makaron jáne shujyq ónimderi, sút taǵamdary, nan jáne basqa da azyq-túlik kiredi. Sonymen qatar, árbir áskerı qyzmetshi kún saıyn 200 gramm jemispen qamtamasyz etiledi.
Jekelegen sanattaǵy áskerı qyzmetshiler úshin arnaıy ratsıondar qarastyrylǵan. Mysaly, ushqyshtarǵa arnalǵan úles 52 túrli ónimnen turady, onyń kalorııalyǵy — 4 834 kkal, teńiz úlesi — 50 ónim (4 553 kkal). Sondaı-aq shamamen 4 500 kkal bolatyn basqa da úles túrleri bar, — delingen vedomstvo habarlamasynda.
Qazir Qarýly Kúshterde azyq-túlikpen qamtamasyz etýdiń 16 negizgi normasy qoldanylady. Olardyń qatarynda jalpyáskerı, desanttyq-shabýyldaýshy, teńiz, ushý, bıik taýly, emdik jáne jeke ratsıondar bar. Buǵan qosa, qyzmet jaǵdaıyna jáne atqarylatyn mindetterge baılanysty qoldanylatyn segiz qosymsha úles ázirlengen. Olar merekelik kúnderge, qurmet jáne túngi qaraýyldarǵa, emdelip jatqan áskerı qyzmetshilerge, sondaı-aq donorlarǵa arnalǵan.
Azyq-túlik úlesi qunynyń ósýi áskerı qyzmetshilerdiń tamaqtaný sapasyn arttyrýǵa, densaýlyǵyn nyǵaıtýǵa jáne áskerdiń joǵary jaýyngerlik daıarlyǵyn saqtaýǵa baǵyttalǵan.
Budan buryn 2025 jyly Qazaqstannyń áskerı qyzmetshilerine qandaı áleýmettik qoldaý sharalary kórsetilgenin jazǵanbyz.