Rasýl Jumaly: Májilistiń de, máslıhattyń da ájeptáýir jasarýy – mańyzdy
«Bul saılaý tolyǵymen minsiz ótti dep aıta almaıtyn shyǵarmyz. Jalpy saılaý ataýlynyń ózi barlyq elde, onyń ishinde órkenıetti ári damyǵan elderdiń tájirıbesin qaraıtyn bolsaq, eshqaısysy minsiz bolmaıdy. Biraq úrdis, protses retinde bul – bizdiń el úshin óte mańyzdy qadam boldy. Alysqa barmaı-aq túrli elderdegi 2020 jylǵy saılaý tájirıbesin qaraıtyn bolsaq, synaqtan kóptegen memlekettiń súrinip, qulap jatatynyn kórip otyrmyz. Áli kúnge deıin basylmaı jatqan Belarýstegi oqıǵalar, Qyrǵyz Respýblıkasyndaǵy úshinshi revolıýtsııa, Armenııadaǵy jaǵdaı, AQSh-tyń ózindegi tyǵyryqqa ushyraǵanyn kórip otyrmyz», - dedi Rasýl Jumaly elordada ótken «SAILAU-2021: Parlament saılaýynyń aldyn ala qorytyndylary» atty saraptamalyq talqylaýda.
Saıasattanýshy osy rette Qazaqstanda eń aldymen turaqtylyqqa, qaýipsizdikke nuqsan keltirilmeı, saılaý ájeptáýir laıyqty deńgeıde ótkenin aıtyp ótti.
«Bul óte mańyzdy. Ekinshiden, eldegi jańa jaǵdaıda, saıası ahýalda ótkizilip otyrǵanyn atap ótý kerek. Prezıdent bastaǵan reformalar iske asyrylyp jatyr. Sonyń nátıjesinde birtalaı zańǵa ózgerister engizildi. Osy saılaýdyń jańashyldyǵy – jańa saılaý zańnamasyna sáıkes ótkizilip otyrǵany. Onyń ishinde 30 paıyzdyq kvotany atap óter edim. Tıisinshe Májilistiń de, máslıhattyń ájeptáýir jasarýy menińshe, óte mańyzdy», - dedi ol.
Rasýl Jumaly Parlament saılaýynyń ýaqytynda ótkizilgenin jaǵymdy qubylys ekenin jetkizdi.
