Rasýl Jumaly: Qajet bolsa, eldegi tártipti qolǵa qarý alyp qorǵaýǵa daıynbyz

NUR-SULTAN. QazAqparat – Saıasattanýshy Rasýl Jumaly QR Prezıdenti Qasym-Jomart Toqaev eldegi jaǵdaıǵa baılanysty Qazaqstan halqyna joldaǵan úndeýine oraı pikir bildirdi, dep habarlaıdy QazAqparat tilshisi.

«Elde bolyp jatqan jaǵdaılar – eshqandaı demokratııaǵa qatysy joq dúnıeler. Syrttan kelgen kem degende birneshe júz adam (Ózbekstan, Qyrǵyzstan, Aýǵanstan dep estip jatyrmyz) kásibı, armııalyq daıyndyǵy bar azamattar bizdiń ashynǵan halyqtyń áńgimesin paıdalana otyryp, óziniń máselesin sheshý úshin úlken qııanatqa baryp otyr. Qııanat bolǵanda, azamattardyń ólimine, adamdardyń ólimine ákelip jatqan úlken tragedııa týyndatyp otyr. Ony endi aıqyn kórip otyrmyz. Kesheli beri Almatynyń bes telearnasyn órtegen, joıǵan. Kóktóbedegi aqparat taratýshy ortalyqqa qasaqana shabýyldar jasaldy. Onyń ishinde, ókinishke qaraı, bizdiń keıbir zııalysymaq azamattardyń da tirligi bar. Osyǵan aldandy, basqa da boldy degendeı», - deıdi sarapshy.

Qoǵam qaıratkeri basqynshylyqa barǵan toptardyń áreketinen jymysqy maqsattaryn túsinýge bolatynyn aıtady.

«Meniń oıymsha, basty maqsattary aldymen qarý-jaraq arsenaldaryn alý bolǵan. Almatydaǵy qarý satatyn dúkenderdiń bári túgel tonalǵan. Ekinshiden, qarý-jaraq saqtalǵan qoımalardy, shekara qyzmeti ınstıtýtynyń jumysyn turalatý úshin bir jaǵynan dúkenderge, ekinshi jaǵynan sondaı nysandarǵa shabýyl jasalǵan», - dedi Rasýl Jumaly.

Onyń aıtýyna qaraǵanda qazirgi qazaqstandyqtardyń báriniń ortaq mindeti – eldi turaqtandyryp, halyqtyń jaǵdaıyn jasaý.

«Kerek bolsa, polıtsııa men armııa qııanatqa barýǵa májbúr bolyp otyr. Sondyqtan, bul jaǵdaıda azamattarǵa es jııatyn, aqylǵa toqtaıtyn kez keldi. Bul oıynshyq emes. Eldiń bolashaǵy bar ma, joq pa? Biz memleket retinde saqtalamyz ba, saqtalmaımyz ba deıtin sátke tap kelip turmyz. Búgin óte kúrdeli jaǵdaıda turmyz. Óz basym el ishinde júrgen azamattar, eldiń bolashaǵyn oılaıtyn azamattar oılanatyn, sabyrǵa toqtaıtyn kez keldi», -deıdi saıasattanýshy.

Sonymen qatar, ol Prezıdent óte durys baǵyt ustanyp otyr dep esepteıdi.

«Prezıdenttiń sózine toqtap, qoldaýymyz kerek. Elimizdegi eń batyl, eń sapaly sheshim qabyldaıtyn bir ǵana ınstıtýt qaldy qazir. Ol – Prezıdent. Prezıdenttiń janyna toptasýymyz kerek. Qajet bolsa, qolymyzǵa qarý alyp biz de kóshege shyǵýǵa ázirmiz. Elimizde tártipke qarsy, memleketke qarsy, konstıtýtsııalyq baǵytqa qarsy shyǵyp jatqan azamattar ózderin kópshilikpiz dep oılamasyn. Kópshilik – bizbiz. Jaǵdaıdyń qalaı bolatynyn biz sheshemiz. Sony eskersin», - dep túıindedi sarapshy.