Rasýl Jumaly: Bul saılaýdyń birqatar jańashyldyǵy bar
Aıta keteıik, búgin elordada Eýrazııalyq ıntegratsııa ınstıtýtynyń uıymdastyrýymen «Saılaý-2021: saıası modernızatsııanyń jańa kezeńi» atty sarapshylyq kezdesý ótti.
Іs-sharanyń maqsaty – Parlament Májilisine saılaýdyń erekshelikteri men rólin saraptamalyq turǵyda talqylaý, saıası partııalardyń strategııalaryn taldaý, el azamattarynyń saıası mádenıetin arttyrý boıynsha ustanymdar men usynystardy ázirleý.
«Qazir bárimiz qyzyqty da mańyzdy kezeńniń aldynda turmyz. Saılaýǵa bir aıdan az ýaqyt qaldy. Bul saılaýdyń birtalaı jańashyldyǵy bar. Eski dástúrlerdiń de saqtalýyn, onyń ishinde keleńsiz tájirıbelerdiń qaıtalanýyn baıqap otyrmyz. Jańashyldyqqa kelsek, saılaý kóp jyldan keıin óziniń zańmen belgilengen kezeńinde ótip otyr. Menińshe, bul - ıgi ári jaqsy jańalyq. Buǵan deıin prezıdenttik bolsyn, parlamenttik bolsyn saılaýlardyń barlyǵy túrli sebeptermen kezekten tys ótetin. Birese daǵdarysty jeleý etip, birese aýqymdy jobalardy alǵa tarta otyryp saılaýdyń merzimi ózgeretin. Menińshe, bul faktor – órkenıettiliktiń, memlekettiń, bıliktiń óz zańdaryn qurmetteı bilýiniń kórsetkishi», - dedi Rasýl Jumaly.
Saıasattanýshy Ulttyq keńes aıasynda birtalaı saıası modernızatsııaǵa bet túzegen zańdar qabyldanyp, ózgerister engizilgenin aıtyp ótti.
«Parlamenttiń oppozıtsııa uǵymynyń engizilip otyrǵany, sol oppozıtsııanyń qýyrshaq emes naqty bolýy – bizdiń elimizge aýadaı qajet. Qazir saıası alańdaǵy partııalar qanshalyqty búkil qoǵamnyń múddesin, narazylyǵyn bildirip otyr? Bul taqyrypta pikirtalas qurýǵa bolady. Meniń oıymsha, jaqyn arada jańa bir saıası oıynshylardyń, toptardyń paıda bolýy óte mańyzdy. Bılik organdary oǵan barynsha múmkindik jasaýy kerek», - dedi saıasattanýshy.
