Rasýl Jumaly: Aýyl ákimderin saılaý ádil uıymdastyrylýy kerek
«Bárine qarsymyn» baǵanyn engizý týraly zańnamalyq túzetý barlyq deńgeıdegi saılaýǵa qatysty. Parlamentke ótý kedergisin 7%-dan 5%-ǵa deıin tómendetý bastamasy da solaı. Aýyldyq okrýg ákimderin tikeleı saılaýǵa keletin bolsaq, jalpy, bul úrdis durys. Onyń ústine, bul týraly 90 jyldardan beri aıtylyp keledi. Árıne, biz ortalyqtandyrylǵan basqarýy bar ýnıtarlyq memleketpiz. Biraq, soǵan qaramastan, ókilettikter men bastamalardyń bir bóligi jergilikti jerlerge berilýi kerek. Bul jergilikti ózin-ózi basqarý ıdeologııasyn qayptastyrady. 90-shy jyldardan beri ýáde etilip kelgenimen, endi ǵana jetip otyrmyz. Osy jyldyń kúzinde kóptegen aýyldyq okrýgterde saılaý ótedi. Ideıa, árıne, durys. Elordada otyryp naqty aýdandardyń barlyq muqtajdyqtary men qajettilikterin bilý múmkin emes», - deıdi sarapshy.
Ol, sondaı-aq, saılaýdy ádil ótkizýdiń mańyzdylyǵyna toqtaldy.
«Ákimshilik resýrsty eshkimniń paıdalanbaýy, bıýlletender durys eseptelýi, jalpy azamattardyń mundaı saılaýǵa sengeni mańyzdy», - degen Rasýl Jumaly jańadan saılanǵan aýyldyq okrýg ákimderi jergilikti problemalardy óz betinshe sheshe alýy úshin ózi bılik ete alatyn bıýdjet qarajatynyń kózderi aıqyn bolýy kerek degen oı aıtty.
Búgin Parlament Senatynyń jalpy otyrysynda «Qazaqstan Respýblıkasyndaǵy saılaý týraly «Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Zań qabyldandy. Zań Memleket basshysynyń tapsyrmasyn oryndaý maqsatynda ázirlengen jáne aýdandyq mańyzy bar qalalardyń, aýyldardyń, kentter men aýyldyq okrýgterdiń ákimderin tikeleı saılaýdy engizýge baǵyttalǵan. Zań jobasy saılaý kezinde saıası partııalardyń ótý shegin tómendetedi. Sondaı-aq, barlyq deńgeıdegi saılaý bıýlletenderinde «bárine qarsymyn» degen baǵan engiziletin bolady.
