Rasýl Jumaly 2017 jyldy «Qazaq tiliniń jyly» dep jarııalaýdy usyndy

ASTANA. QazAqparat - 2017 jyldyń 1 qańtarynda saıasattanýshy Rasýl Jumaly  Feısbýk áleýmettik jelisi arqyly  2017 jyldy «Qazaq tiliniń jyly» dep jarııalaý týraly usynys tastady, dep habarlaıdy QazAqparat.

«Meniń oıymsha, 2017 tek qorshaǵan álem emes, Qazaq úshin betburysty jyl bolmaq. Soǵan aqylymyz, jigerimiz, namysymyz, azamattyǵymyz ázir tursyn. Óz basym FB-daǵy orysshamdy ótken 2016-da qaldyrdym. 2017-ni Qazaq tiliniń Jyly dep jarııalaıyq»,-dep jazdy saıasattanýshy.

Qazir áleýmettik jelide halyq bul usynysty qoldap, memlekettik qyzmette júrgen sheneýnikterdiń barlyǵy «Memlekettik qyzmetker týraly» zańǵa sáıkes, taza qazaqsha sóılesin degen usynystaryn bildirip jatyr.

Aıta keteıik, Memleket basshysy Nursultan Nazarbaev «Qazaq  tili úsh tildiń bireýi bolyp qalmaıdy. Úsh tildiń birinshisi, negizgisi, bastysy, mańyzdysy bola beredi. Qazaq tili - Qazaqstan Respýblıkasynyń memlekettik tili» degen bolatyn.