Rasýl Rysmambetov: Zeınetaqy jınaǵy qarttyq shaǵyńyzdy qamtamasyz etýi tıis
ASTANA. KAZINFORM – Qarjyger ári bıznes salasynyń sarapshysy Rasýl Rysmambetov zeınetaqy jınaqtarynyń eń tómengi jetkiliktilik shegin arttyrý týraly sheshimdi qoldap, ony ýaqytyly ári oryndy qadam dep baǵalady.
Onyń aıtýynsha, zeınetaqy jınaqtarynyń negizgi maqsaty – azamattardy eńbek qyzmeti aıaqtalǵannan keıin qarjylyq turǵydan qamtamasyz etý.
– Men árdaıym zeınetaqy jınaqtaryn jappaı alýǵa qarsy bolyp keldim. Zeınetaqydaǵy qarajat tabıǵaty jaǵynan páter satyp alýǵa, jóndeý júrgizýge nemese basqa da kúndelikti qajettilikterdi óteýge arnalǵan jınaq emes. Bul adam belsendi eńbek ete almaıtyn kezeńde laıyqty ómir súrýine arnalǵan qarajat. Sondyqtan jetkiliktilik sheginiń kóterilýin qısyndy ári der kezinde qabyldanǵan sheshim dep sanaımyn. Onyń ústine bul óte jumsaq sheshimderdiń biri, – dedi Rasýl Rysmambetov.
Sarapshynyń pikirinshe, qazirgi tańda reformalanyp jatqan zeınetaqy júıesi óziniń negizgi mindetin – azamattardy zeınetaqymen qamtamasyz etý qyzmetin atqarýy kerek.
Ol zeınetaqy jınaqtaryn merziminen buryn alý bolashaqtaǵy tólem kólemine tikeleı áser etetinin atap ótti.
– Adam búgin jınaǵyn sheship alsa, erteńgi zeınetaqysyn azaıtady. Qysqa merzimde belgili bir nátıje bolýy múmkin, alaıda 20-30 jyldan keıin memleket jetkiliksiz zeınetaqy máselesine tap bolyp, qosymsha bıýdjet qarajatyn jumsaýǵa májbúr bolýy yqtımal, – dedi ol.
Qarjygerdiń aıtýynsha, azamattardyń ál-aýqatyn arttyrýdyń tıimdi joly – zeınetaqy jınaqtaryn jumsaýǵa múmkindik berý emes, resmı tabys pen zańdy jumyspen qamtýdy kóbeıtý.
– Azamattyń ál-aýqatyn kóterýdiń eń durys joly – onyń zeınetaqy jınaǵyn kúndelikti shyǵyn kózine aınaldyrmaý. Kerisinshe, joǵary resmı jalaqy alýǵa yntalandyratyn jaǵdaı jasaý qajet. Jalaqy neǵurlym joǵary bolsa, zeınetaqy jarnasy da soǵurlym kóp túsedi jáne bolashaqtaǵy zeınetaqy kólemi de artady, – dep atap ótti sarapshy.
Rasýl Rysmambetov jappaı zeınetaqy jınaǵyn alý turǵyn úı naryǵyna da áser etkenin aıtty.
– Zeınetaqy qarajatynyń bir bóligi turǵyn úı naryǵyna baǵyttaldy. Bul kóptegen azamattyń baspana máselesin sheshýge kómektesti. Degenmen sońǵy jyldary jyljymaıtyn múlik baǵasynyń aıtarlyqtaı ósýine áser etken faktorlardyń biri de osy boldy, – dedi ol.
Sarapshy jetkiliktilik shegi eldegi ekonomıkalyq jaǵdaıǵa sáıkes qaıta qaralýy tıis ekenin aıtty.
– Ómir súrý uzaqtyǵy artyp keledi, eń tómengi zeınetaqy mólsheri ósýde, ınflıatsııa bar. Osyndaı jaǵdaıda zeınetaqy jınaqtarynyń jetkiliktilik sheginiń de kóterilýi zańdy qubylys, – dedi Rasýl Rysmambetov.
Onyń pikirinshe, qoǵam BJZQ qarajatyn alý máselesin emes, halyqtyń resmı tabysy men jumyspen qamtylýyn arttyrý joldaryn talqylaýy qajet.
– BJZQ-dan aqshany qalaı alý kerektigin emes, joǵary resmı jalaqy alatyn jáne turaqty zeınetaqy jarnasyn tóleıtin azamattardyń sanyn qalaı kóbeıtý kerektigin talqylaǵan jón. Bul – makroekonomıkalyq deńgeıdegi mindet, – dep túıindedi sarapshy.
Sondaı-aq ol zeınetaqy aktıvterin basqarý júıesin odan ári jetildirý qajettigin aıtty.
– Kelesi kezeńde bıýdjet saıasatyn ońtaılandyryp, zeınetaqy qarajatynyń bıýdjet tapshylyǵyn jabý quralyna aınalýyna jol bermeý qajet. Sonymen qatar zeınetaqy aktıvterin basqarý tásilderin qaıta qaraýdyń mańyzy zor. Qazir bul baǵytta eleýli ózgeristerdiń aldynda turmyz jáne usynylyp otyrǵan jańashyldyqtardy muqııat zerdeleý kerek, – dedi Rasýl Rysmambetov.
Aıta keteıik, zeınetaqy jınaǵynyń 2026 jylǵy eń tómengi jetkilikti shegi jarııalandy.
