Rasýl óte talantty, sezimtal, ónerli ári jan-jaqty jan edi - Á. Abdrahmetova
ASTANA. 27 qyrkúıek. QazAqparat - Rasýl óte talantty, sezimtal, ónerli ári jan-jaqty jan edi. Ol ónerdiń kóptegen salasyna, mýzykaǵa, sánge qyzyǵatyn. Til úırenýge de óte qabiletti boldy. Degenmen, janyna eń jaqyny - sýret salý bolatyn.
Ol 2-3 jasynan bastap sýret salýmen aınalysty. Qanshama sýret úıirmelerine bersem de, olardan qashyp ketip, óz betimen sýret salǵandy unatatyn. Sóıtip júrip eshkimge uqsamaıtyn óz stılin tapty. Sum ajal ony bul ómirden erte alyp ketse de, búgingi shara Rasýldyń artynda óshpes iz qaldyrǵanynyń dáleli.
Bul týraly búgin Astanadaǵy Beıbitshilik jáne kelisim saraıynyń «Qulanshy» qazirgi zaman óner ortalyǵyndaǵy «Taǵdyr joly» atty Rasýl Abdrahmetovtyń jeke kórmesinde Rasýldyń anasy Álııa Abdrahmetova aıtty.
Rasýl qamshynyń sabyndaı qysqa ǵumyrynda kóptegen mamandyqtardy ıgerip úlgeripti. Telejúrgizýshi jáne telejýrnalıst kýrsyn, Kembrıdjdiń Óner men dızaın, mýzyka men teatr óneri salasyndaǵy mamandandyrylǵan daıyndyq mektebin, Italııadaǵy Eýropalyq dızaın ınstıtýtyn «grafıkalyq dızaın» mamandyǵy boıynsha, T. Júrgenov atyndaǵy Qazaq ulttyq óner akademııasynyń «Kıno jáne TV» fakýltetin «anımatsııa rejıssýrasy» mamandyǵy boıynsha támamdaǵan.
Al 2011 jyly San-Frantsıskodaǵy Óner akademııasyna «Anımatsııa jáne vızýaldyq effektiler» kýrsyna qabyldaý konkýrsyna qujat tapsyryp, irikteý týrynan ótedi. Sol jyly 22 qyrkúıekte Astana qalasyndaǵy Ál-Farabı men Baǵanashyl kósheleriniń qıylysynda kólik soǵyp ketip, nebary 23 jasynda qaza tapty.
Rasýl sýret salýda negizinen kádimgi qara qaryndash pen aq paraqty paıdalanǵan. Ol mahabbat, ómir taqyrybyna, sondaı-aq qazirgi jastardy kóbirek tartatyn fentezı janryna qalam terbegen. Onyń sýretterinde aq pen qaranyń máńgi bitpes ıtjyǵys kúresi men adamdar arasyndaǵy dostyq sheber sýretteledi.
Kórmege jınalǵandar Rasýldyń «álemine» boılap, tylsym ónerinen árqaısysy ózinshe oı túıip qaıtty.
