Rasýl Mırzaev pen Erjan Estanov qaıta kúsh synasady
ASTANA. 13 jeltoqsan. QazAqparat - 19 jeltoqsanda Almatydaǵy Balýan Sholaq atyndaǵy sport saraıynda «Uly maıdan» dep atalatyn asa iri halyqaralyq jarys ótedi.
Bıylǵy jyldyń kókteminde atalmysh jarystyń tusaýy kesilgen bolatyn. Basty jekpe-jekte atyshýly Reseı sportshysy Rasýl Mırzaev pen qandasymyz Erjan Estanov sheberlik baıqasty. Ókinishke qaraı, bul báseke upaı sanymen Mırzaevtiń paıdasyna sheshildi. Osy jeńistiń arqasynda Rasýl ózine tıesili álem chempıony ataǵyn saqtap qaldy.
Keıinnen eki jaq ózara kelissózder júrgizdi. Sonyń nátıjesinde Rasýl men Erjan qaıta kúsh synasatyn boldy. Bul joly Estanov el senimin aqtaıdy dep úmittenemiz. Óıtkeni Almatyda ótetin bul jarys Qazaqstan Respýblıkasynyń Táýelsizdik kúnine oraılastyrylyp otyr. Al osyndaı mereke kezinde qazaq jigitiniń jeńilýge esh haqy joq.
«Uly maıdan» jarysy barysynda qazaqtyń qos maqtanyshy - Qaırat Ahmetov pen Aslan Toqtarbaev chempıondyq táj úshin aıqasady. Ár jeńisinen keıin «Qara jorǵa» bıleıtin Qaırat aıqas alańynda birde-bir ret jeńilip kórgen emes. Onyń búrkenshik esimi - «Qazaq».
Al Aslan baýyrymyz «Arystan» degen laqap atpen tanyldy. Ekeýiniń de qarsylasy óte qaýipti.
Bul keshte Ahmetov Kúnshyǵys elinen kelgen Tatsýeı Vatanabemen aıqasady. Osy kúnge deıin Vatanabe 21 kezdesý ótkizip, 14 ret jeńiske jetti. Tórt ret utylyp, taǵy úsh básekeni teń aıaqtady. Toqtarbaev amerıkalyq Kevın Krýmmen kúsh synasady. AQSh sportshysy 16 kezdesýde 12 ret jeńis toıyn toılady, dep habarlady alasharena.kz.
