Rashıda Datı men Karlos Gon sybaılas jemqorlyqqa baılanysty sot aldynda jaýap beredi
ASTANA. KAZINFORM – 2021 jyldan beri tergeý astynda júrgen Frantsııanyń mádenıet mınıstri Rashıda Datı Renault isi boıynsha sot aldynda jaýap beredi. Bul onyń Parıj meri qyzmetine kandıdatýrasyna qaýip tóndirýi múmkin, dep habarlaıdy VVS.
Frantsýz sot tergeýshileri seısenbi kúni mádenıet mınıstri Rashıda Datı men Renault-Nissan kompanııasynyń burynǵy bas dırektory Karlos Gon isin qylmystyq sotqa jiberýge qaýly etti. Ekeýi de sybaılas jemqorlyqqa jáne yqpal etý saýdasyna qatysty aıyptalyp otyr, dep jazady AFP.
2026 jyldyń naýryz aıynda Parıj meri bolady dep boljanyp otyrǵan Emmanıýel Makronnyń mınıstri Datı 2010-2012 jyldar aralyǵynda ózi múshesi bolǵan Eýroparlamenttegi Renault-Nissan tobyna lobbı jasaý úshin 900 myń eýro alym aldy degen kúdikke ilindi.
Rashıda Datıdiń halyqtyń qalaýlysy mártebesi onyń advokattyq qyzmetpen aınalysýyna kedergi keltirmeıdi jáne ol árqashan bul aqyly kelisimde qarastyrylǵan konsýltatsııalyq qyzmetter ekenin aıtty. Alaıda sýdıalar onyń is júzinde eshqandaı jumys jasamaǵanyna kúdiktenip otyr.
Renault-Nissan avtokólik alıansy eýropalyq saılaýǵa qatysý úshin 2009 jyly ádilet mınıstri qyzmetinen ketkennen keıin Rashıda Datıdi keńesshi retinde jaldady.
2024 jyldyń qarashasynda Ulttyq qarjy prokýratýrasy (PNF) Rashıda Datı men Renault-Nissan burynǵy basshysy Karlos Gondy 2019 jyly bastalǵan sybaılas jemqorlyq tergeýiniń bóligi aıasynda sot aldynda jaýap berýin talap etti.
Rashıda Datı Eýroparlamentte frantsýz óndirýshisiniń múddesin qorǵady degen boljam bar, tergeýshilerdiń pikirinshe, bul birqatar zańdar boıynsha daýys berý qorytyndylaryna áser etti.
Eki sottalýshy da taǵylǵan aıyptarǵa qarsy shyǵyp otyr.
Aıta keteıik, Frantsııa Senegaldaǵy sońǵy áskerı bólimderin shyǵardy.