Ramzan Qadyrov sıqyrshylarmen kúresýge shaqyrdy
ASTANA. 14 aqpan. QazAqparat - Aımaq ákimshiliginiń saıtynda jarııalanǵan úndeýinde Sheshenstan Respýblıkasynyń prezıdenti Ramzan Qadyrov baqsy-balgerler men sıqyrshylardyń jolyn kesip, qyzmetin toqtatýdy talap etti.
«Alaıaqtar adamdardyń kóz jasy men azap-mehnatyn paıdalanyp, kún kórýdi ádetke aınaldyrǵan. Qaraqan bastarynyń qamy úshin eshteńeden taıynbaıdy. Bilimi men biligi joq olar bylaıǵy jurtty «aýrýyńnan aıyqtyramyz» dep, aldap-sýlap, qaltasyn qaǵady. Ondaı alaıaqtardyń quryǵyna tek ańqaýlar ǵana emes, sonymen birge, basyna kún týyp, jany qınalǵandar da túsip jatyr», - depti Sheshenstan basshysy.
muslim.kz saıtynyń jazýynsha, Groznyı qalalyq ákimshilik ókilderimen jáne bilim berý mekemesiniń basshylarymen kezdesýinde Ramazan Qadyrov ondaı alaıaqtardyń dinniń atyn jamylyp, áreket etetinin alǵa tartty. Alaıaqtarmen kúresýde qalalyq ákimshilik pen quqyqqorǵaý oryndarynyń jáne dinı mekemelerdiń jumysyn úılestirýdiń mańyzdylyǵyna toqtaldy. «Ańqaý elge aramza molda» bolyp, «qoı terisin jamylǵan qasqyrlar» qoǵamǵa úlken qaýip tóndiretindikten, olarǵa qarsy ıdeologııalyq kúresti kúsheıtýge shaqyrdy.
Bul kezdesýge, sonymen birge, «qyzmetińdi ósirem», «otbasyńdaǵy jaǵdaıdy retteımin», «aýrýyńnan aıyqtyramyn» dep adamdardy aldap, aqsha taýyp júrgen turǵyndar da shaqyryldy. Olardyń keıbireýi ózderin «sheıhpiz», «kóripkelmiz» dep sendirgen. «Halyq emshileri» birde-bir aıatty nemese duǵany bilmeıtin bolyp shyqty.
Ramzan Qadyrov olardy ıslamǵa jat, zańǵa qaıshy bul joldan bas tartýǵa shaqyrdy. Sondaı-aq, buǵan qulaq aspaǵandardy zańmen qýdalaıtynyn da qatań eskertti. Sóziniń sońynda mundaı alaıaqtardyń kesirinen talaı otbasynyń oırany shyǵyp, shańyraǵy shaıqalǵanyn aıtty.
