Ramzan Kadyrov Izraılde «Álem meshitin» ashty
ASTANA. QazAqparat - Sheshenstan Prezıdenti Ramzan Kadyrov Ierýsalım túbindegi arabtardyń eldi mekenindegi meshittiń ashylý saltanatyna qatysty. Izraıldegi eń úlken meshitke Sheshen respýblıkasynyń tuńǵysh prezıdenti Ahmat Kadyrovtyń aty berilgen, dep habarlady sheteldik BAQ.
«Álem meshiti» degen ekinshi ataýy bar úsh myń adamǵa arnalǵan meshit A.Kadyrov atyndaǵy kóshede ornalasqan. Jergilikti buqaralyq aqparat quraldarynyń derekterine qaraǵanda, Alla úıin salýǵa shamamen 10 mln. dollar qarjy jumsalǵan. Al atalǵan qarjynyń úshten ekisin Sheshenstandaǵy qorlar men qoǵamdyq uıymdar bólgen.
Meshittiń kire beris esiginde: «Sheshen Respýblıkasynyń birinshi prezıdenti, Reseı batyry Ahmat qajy Kadyrov atyndaǵy meshit», - dep jazylǵan.
