Rámizderdi nasıhattaý júıesin jańǵyrtý jónindegi 2015-2020 jyldarǵa arnalǵan jospardyń jobasy ázirlendi - G.Ábdiqalyqova (FOTO)

ASTANA. QazAqparat - Búgin QR Memlekettik hatshysy Gúlshara Ábdiqalyqovanyń tóraǵalyǵymen Memlekettik rámizder jónindegi respýblıkalyq komıssııanyń otyrysy ótti.

«Memlekettik rámizderdi, eldi mekenderdiń, qalalardyń, aýdandardyń, Astana jáne Almaty qalalary men oblystardyń rámizderin qoldaný men nasıhattaý júıesin jańǵyrtý jónindegi 2015-2020 jyldarǵa arnalǵan jospardyń jobasy ázirlendi», - dedi Gúlshara Ábdiqalyqova.

Bul qujatty Elbasynyń usynǵan «100 naqty qadam» Ult josparyn oryndaý aıasyndaǵy Jańǵyrtý jónindegi ulttyq komıssııa ázirledi.

Memlekettik hatshy Jospardy ázirleýdiń basty maqsaty - qazaqstandyq biregeılikti jáne birlikti nyǵaıtýǵa baǵyttalǵan memlekettik rámizderdi qoldaný men nasıhattaý júıesin jańǵyrtý ekenin atap ótti.

Otyrys barysynda tıisti memlekettik organdarǵa jańǵyrtý jónindegi sharalar ótkizý men memlekettik rámizder salasynda normatıvtik-quqyqtyq bazany jetildirý, sondaı-aq aqparattyq nasıhattaýǵa nazar aýdarý júkteldi.