Rámizder kúnine oraı Almatydaǵy ulttyq kitaphanada kórme ashyldy

ALMATY. QazAqparat – Almatydaǵy Ulttyq kitaphanada rámizder kúnine oraı kitap-ıllıýstratsııalyq kórme uıymdastyryldy, dep habarlaıdy QazAqparat tilshisi.

Ulttyq kitaphanadaǵy kórme 10 kúnge deıin sozylady. Munda oqyrmandar memlekettik rámizderdiń tarıhymen jiti tanysa alady.

Memlekettik úsh nyshandy tańdaý úshin 1992 jyldyń basynda Joǵarǵy Keńes prezıdıýmy jumys tobyn quryp, arnaıy shyǵarmashylyq komıssııa taǵaıyndady.

Onyń quramyna tarıhshylar, zańgerler jáne basqa da tanymal qaıratkerler kirdi.

Osydan keıin búkil Qazaqstan kóleminde Eltańba, Tý, Ánuran nusqalaryna konkýrs jarııalandy.

1992 jyldyń 4 maýsymynda QR Tuńǵysh Prezıdenti - Elbasy Nursultan Nazarbaev «Qazaqstan Respýblıkasynyń Memlekettik týy týraly», «Qazaqstan Respýblıkasynyń Memlekettik eltańbasy týraly» jáne «Qazaqstan Respýblıkasy Memlekettik ánuranynyń mýzykalyq redaktsııasy týraly» Zańdarǵa qol qoıdy.

Merekege arnaıy uıymdastyrylǵan kórmeden memlekettik rámizderi avtorlarynyń ómirbaıany,shyǵarmashylyǵy, atqarǵan qyzmetteri jáne osy ýaqytqa deıin merzimdik basylymdarda jarııalanǵan maqalalarmen tanysýǵa bolady.

Aıta keteıik, QR Ulttyq kitaphanasynyń qorynda memlekettik rámizder týraly qazaq jáne orys tilderinde 3 myńnan astam aqparat jınaqtalǵan.