Rámizder kúni Astanada 600-den astam shara ótedi
ASTANA. QazAqparat – Astana qalasynyń Tilderdi damytý jáne arhıv isi basqarmasy basshysynyń orynbasary Áıgerim Moldabaeva Memlekettik rámizder kúni elordada qandaı sharalar ótetinin aıtty, dep habarlaıdy QazAqparat tilshisi.
Onyń aıtýynsha, Astana qalasynyń ákimdigi elordada memlekettik rámizderdi dáripteý, patrıotızmdi, eldiń tarıhy men mádenıetine qurmetti damytý jumystaryn atqaryp keledi.
«Bıyl QR Memlekettik rámizderi kúnine oraı, qalalyq josparǵa sáıkes, 600-ge jýyq ımıdjdik is-sharalar ótkiziledi. Bul kórsetkish byltyr ótken sharalarmen salystyrǵanda shamamen úsh esege kóp. Onyń ishinde túrli tanymdyq saıystar, sýret pen shyǵarma baıqaýlary, jalaýshalar taratý aktsııasy, kezdesýler, semınar, merekelik kontsertter, sherý syndy sharalar bar», - dedi Á. Moldabaeva Astana kommýnıkatsııalar qyzmetinde ótken brıfıngte.
Sonymen qatar, kósheler men alańdarda, saýda ortalyqtarynda, qoǵamdyq kólikter men áýejaıdaǵy LED-ekrandarda memlekettik rámizder týraly aýdıo jáne beınerolıkter kórsetilip, elorda turǵyndary arasynda «Qazaqstannyń Týyn qolda», «Meniń Týym – meniń maqtanynshym» atty jappaı chellendj uıymdastyrylady.
«Osy rette ákimdik merekelik sharalarmen qatar jyl boıy qala aýmaǵynda «QR Memlekettik rámizderi týraly» zań talaptarynyń saqtalýyna monıtorıngti turaqty túrde júrgizip otyrady. Memlekettik rámizderdi qurmetteý, qoldaný men nasıhattaý salasyndaǵy memlekettik saıasatty iske asyrý jumystary elordamyzda ári qaraı josparly júıesin tabady», - dedi Áıgerim Moldabaeva.
