Rámizder kúni: Almatydaǵy eń úlken tý qaı jerde ornalasqan
ALMATY. QazAqparat - 29 jyl buryn QR Tuńǵysh Prezıdenti - Elbasy Nursultan Nazarbaev táýelsiz Qazaqstannyń memlekettik rámizderi - týy men eltańbasyn, al 2006 jyly jańa ánuranyn bekitti. QazAqparat tilshisi Almatydaǵy elimizdiń eń úlken týy qaı jerde ornalasqanyn bildi.
Almatydaǵy eń úlken memlekettik tý 2019 jyly Medeý muz aıdynynyń mańyna ornatyldy.
Memlekettik týdyń ornatylýy Ulttyq basketbol federatsııasynyń bastamasymen «Nur Otan» partııasynyń jáne Almaty qalasy ákimdiginiń qoldaýymen júzege asty.
Týtuǵyrdyń bıiktigi - 40 metr. Týdyń eni - 7 metr, uzyndyǵy - 14 metr.
Qalalyq qoǵamdyq damý basqarmasynyń málimetinshe, qalanyń barlyq memlekettik mekemelerinde jáne ákimshilik ǵımarattarda Qazaqstan Respýblıkasynyń memlekettik rámizderin paıdalaný tártibiniń saqtalýy boıynsha monıtorıng únemi júrgizilip otyrady.
Almatyda 600-den astam memlekettik nysan bar.
«Monıtorıng QR ST 988-2007 Memlekettik standartynyń talaptaryna sáıkestigi boıynsha júzege asyrylady. Sonymen birge memlekettik eltańbadaǵy «QAZAQSTAN» latyn grafıkasy tekseriledi», - dep jaýap berdi basqarmadaǵylar.
Aıta keteıik, Qazaqstandaǵy eń úlken týdyń eni - 15, uzyndyǵy - 30 metr.
Ol Nur-Sultan qalasynda «Atameken» etnomemorıaldy kesheniniń aýmaǵyna ornalasqan .
