Ramazanda temekisin tastaǵandar Qadir túninde kópshilik aldynda aty atalyp, duǵaǵa qosylady
ASTANA. 24 shilde. QazAqparat - Ramazan - rýhanı álemge ózgeris ákeletin, jan dúnıeńe bir silkinis jasaıtyn aı. Sebebi, adam ashyǵý arqyly qan tamyrymen júretin shaıtandardyń jolyn bógep, jamandyqqa úndeıtin aty jamannyń aıaǵyna tusaý salyp, jat ádetterden bir taban bolsyn keri sheginedi. Mine, osy sebepti de Ǵalamnyń Rahym Nury Paıǵambarymyz (s.ǵ.s.): «Ramazan - shaıtandar kisendeletin aı», - degen. Árıne, buǵan eń áýeli adamnan berik nıet, temirdeı tózim, shamaly sabyr kerek. Sonda ǵana adam haıýanı sıpattan perishtelik rýhqa qadam basady. Óıtkeni, Paıǵambarymyz nyǵmettiń nıetke saı beriletinin aıtady.
Jalpy, Ramazan - jat ádetterden arylýǵa qolaıly aı. Máselen, kúndiz aýzy berik jandarǵa temeki tastaý múmkindigi mol. Tek keshkisin aýyz ashqan soń sabyrlyq tanytsa bolǵany.
Muslim.kz saıtynyń jazýynsha, osyǵan oraı byltyrǵy múbárák Ramazan aıynda «Áziret Sultan» meshitiniń bas ımamy Qaırat Joldybaıuly jaqsy bir bastamaǵa muryndyq bolǵan edi. Ramazan aıy bastalǵan bette bas ımam juma minberinen: «Alla razylyǵy úshin Qasıetti Ramazan aıynda temekiden, sol sekildi basqa da jaman ádetterden arylýǵa úndeımin. Kim bul úndeýime qoldaý kórsetip, temekisin tastaıtyn bolsa, Qadir túninde sol azamattarymyzdy Ramazan aıynda ómirine bir ózgeris jasaǵany úshin, jaman ádetten jaqsyǵa qadam basqany úshin myńdaǵan jamaǵattyń aldynda attaryn atap, duǵa-tilekterimizge qosamyz», - degen edi. Allaǵa shúkir, Qadir túnine qaraı ondaǵan adam: «Sizdiń úndeýińizden keıin temekimdi tastadym», - dep óziniń jaman ádetine tabandap qarsy turyp, boıyndaǵy nápsisin tizgindeı alǵandyǵyn aıtyp keldi.
«Dál osyndaı úndeý bas ımam tarapynan bıyl da jasaldy. Ótken juma ýaǵyzynda minberden byltyrǵy ıgi bastama bıyl da jalǵasyn tabatyny aıtyldy. Endeshe bıyl da myń aıdan da qaıyrly Qadir túninde qanshama azamattarymyzdyń esimi meshit minberinen atalyp, Allanyń nazaryna kóteriledi degen úmittemiz.Temekisin tastap, Qadir túninde kópshiliktiń aldynda aty atalyp, duǵaǵa qosylýyn qalaıtyn azamattar bolsa, +7 (7172) 422-455 telefonyna habarlasyp nemese saıtymyzdyń elektrondy poshtasyna (hazratsultan@gmail.com ) aty-jónderin jazyp jiberýlerine bolady» delingen meshit málimdemesinde.
